Resultado reunion: Gobierno lo duna gruponan contesta pronto

ORANJESTAD - Gobierno a palabra cu e grupo accion nacional cu lo duna nan 'contesta riba diferente puntonan' di e manifiesto dentro di poco tempo. E reunion urgente cu a cuminsa 6'or y mey, manera cu NoticiaCla.com a informa den forma di primicia, a termina den careda di 8'or. Minister de Meza a declara cu a splica e gruponan e diferente aspectonan y e comision 'a keda satisfecho cu esaki', segun e mandatario. "Nan lo duna e tempo necesario, teniendo na cuenta cu ministernan a bisa cu nan lo contesta mas pronto posibel" vocero di minister Otmar Oduber a bisa NoticiaCla.com. 

Tabata atardi laat cu sindicatonan ABV, Casinowezen, STA, UEA, ALVAST y e organisacion CAN y OPPA a wordo yama pa atende un reunion cu ministernan Mike de Meza y Otmar Oduber na Bestuurskantoor pa papia riba e contenido di e manifiesto. Esaki un fuente serca di e reunion a confirma na NoticiaCla.com net prome cu e reunion a cuminsa. E momento ey no tabata conoci kico a conduci cu toch e reunion aki a tuma lugar, ni kico e condicionan tabata pa e reunion aki. E fotonan ta momento durante e reunion di diahuebs anochi.