CAFT kier mas claridad di gobierno riba maneho financiero

ORANJESTAD – E carta di e colegio di supervision financiero CAFT pa haya ‘mas informacion’ riba e nota di cambio di e presupuesto 2018 a bira publico dialuna. Inicialmente a kere cu esaki tabata e conseho di CAFT pa cu e presupuesto y cu esaki a lek caba, siendo cu e mester a keda publica te dia 1 di juni proximo. Pero ta trata e carta otro cu pregunta riba e nota di cambio. Den e carta aki, CAFT ta (mescos cu el a bin ta haci cu otro gobiernonan) pidi e gobierno na turno, pa mas informacion. Pa loke ta e conseho mes riba e presupuesto, gobierno den un comunicado diaranson (manera cu NoticiaCla a raporta caba) a sigura cu esaki no ta uno negativo, pero e referi na e puntonan (algun di nan menciona den e conseho aki) pa tene cuenta cune. 

CUSTUMBER

A bira un ‘custumber’ cu cada bes e gobiernon(nan) lo no ta informando e colegio financiero suficientemente y ta laga pregunta habri. Den e ultimo carta aki (cu a keda publica), nan ta haci un 5 pregunta riba cual nan kier claridad di gobierno. Minister di finanza Xiomara Ruiz Maduro a confirma pa NoticiaCla diamars cu gobierno a contesta e preguntanan haci dia 16 di april, den un siman di tempo esta dia 26 di april ultimo.

MAS INFORMACION

Segun CAFT, nan kier pa gobierno informa nan adicionalmente riba varios tereno. Entre nan e entrad na dividendo di varios compania di gobierno manera Aruba Tourism Authority, Utilities Aruba N.V. en Refineria di Aruba N.V., y pa manda e cuentanan annual di e companianan desde 2015 pa 2017. Esaki pa mira e situacion financiero di e companianan pa wak si ta responsabel si e companianan aki por sin e ‘dividendonan’ aki. Ademas kier sa con gobierno ta motiva (mas ainda) e plan pa busca mas personal pa e asina yama ‘crisis plan social’. Esaki pasobra gobierno a informa cu mester emplea mas hende ‘cualifica’ pa e plan por funciona. Segun CAFT esaki lo aumenta e gasto di personal, siendo cu kier net pa reduci esaki. Como tal CAFT ta pidi un prognosis di e desaroyo di e gastonan di personal pa 2018. For di e prognosis, CAFT kier pa gobierno splica con tin intencion di reduci e gastonan di personal. Tambe CAFT kier pa gobierno refleha den e presupuesto 2018 cu e suma di pago (di debe) ta 407.9 florin y cu e suma cu mester refinancia e prestamo cu ta cabando, ta 337,9 miyon florin. Ademas CAFT kier mira mas riba e intencion di intensificacion riba cobranza di e.o. impuesto. Entre otro e inversionnan cu kier haci riba e tereno aki pa haci e cobranza di impuesto mas eficiente. Pa CAFT tambe, no ta mucho cla con ta net e gastonan di personal pa e oficina di minister di infrastructura y medio ambiente di Otmar Oduber ta aumenta cu mei miyon florin. Lesa e carta completo AKI.