Bikker: Investigacion interno riba ‘perdida’ di radio di polis

ORANJESTAD – Tin radio nan di polis ta circulando rond na Aruba cu no ta ‘den man di polis’, y minister di husticia Andin Bikker diaranson a confirma na NoticiaCla cu e asunto a yega na ‘su oido’. “Tin un investigacion andando interno” Bikker a bisa, y a bisa mesora cu ta pesey e no ta comenta mas hopi riba e tema aki. “E tin nos atencion, pero mi no ta comenta mas ariba pasobra mi ta kere e por ta contra productivo y ta stroba e investigacion”, e mandatario a sigui bisa. A bisa cu tur radio di polis ta registra y esnan cu pa un of otro motibo a wordo perdi, a wordo desactiva” e mandatario a sigui bisa.

RADIO PERDI

E fenomeno di radio perdi no ta algo nobo, y ta algo cu hopi a cuestiona hopi tempo debi cu tin hendenan cu no ta polis, pero cu si ta haya sa di (cierto) trabou di polis y cu ta p.e yega na un sitio di p.e. un accidente of ‘plaats delict’ te hasta prome cu polis. Esaki por tin su consecuencia pa e trabou di polis, mirando cu sin cu e persona sa, e ta ‘daña’ e sitio pa loke ta posibel ‘pruebanan’ necesario di un of otro caso.

TETRA

Algun aña atras, gobierno a dicidi di inverti den radionan tetra, pa asina evita cu e loke ta wordo papia riba radio por wordo scucha pa medio di un scanner. Antes tabata conoci cu tur loke cu polis papia, tabata abiertamente transmiti riba un scanner cu bo por cumpra na cualkier lugar di radio of electronica. Pa evita esey, a bay over pa esun di tetra, pa asina e señal no ta accesible mes mas pa personanan cu no tin autoridad di polis. Sinembargo durante añanan a bira conoci cu algun radio a ‘disparce’ di cuerpo policial y cu nan lo a cay den man di hendenan ‘no policial’. Den pasado, otro ministernan di husticia tabata na altura pero te asina leu cu ta conoci, no a actua riba esaki.