Polis cu autoridad atrobe pa controla documento di stranhero

ORANJESTAD – Entrante 1 di juni proximo polis ta haya e autoridad bek pa actua den caso di documentacion di personanan riba nos isla. Asina minister di husticia Andin Bikker a anuncia diaranson durante un conferencia di prensa. Den presencia di alto comisario di polis interino Andrew Hoo, el a firma e asina yama ‘aanbiedings brief’ (un documento cu tin cu bay pa Gobernador Alfonso Boekhoudt firma pa e por drenta na vigor pa e fecha menciona). E autoridad polis a perde 8 aña pasa ora cu a trece cambio den e ley aki.

AMPLIA AUTORIDAD

Bikker a splica door di un aspecto tecnico den cambio di ley, no tabatin autoridad mas pa controla documentacion di un persona stranhero. A constata cu e situacion na e.o. e pais bisiña Venezuela a empeora, cu e posibilidad di tin un fluho di persona indesea pa nos isla despues cu nan extende nan estadia ‘legal’ y bira un persona ‘illegal’. E problematica segun Bikker, a crece di tal indole cu a dicidi cu ta bira tempo pa amplia e cantidad di persona cu por controla y actua contra esnan cu no tin permiso pa keda na Aruba como turista of esnan cu a drenta illegal. Como tal a pone e autoridad bek na polis. Cu esaki ta conoce un aumento di centenares di porciento segun Bikker, di esnan cu awor por haci e control aki.