Aruba Wieler Bond ta tene cu su paseo silencio riba bicicleta

ORANJESTAD - Diaranson 16 Mei 2018, Aruba Wieler Bond lo tene su paseo silencio ariba bicicleta. Ride of silence ta un paseo ariba bicicleta unda anualmente , riba e mesun dia y ora, ciclista nan full rond di mundo ta uni nan mes pa concientiza automobilistanan ariba e seguridad den trafico y alavez conmemora ciclistanan cu accidenta of a fayece door di un trafico insigur.

Aruba Wieler Bond y su miembronan ta extende un cordial invitacion na full comunidad di Aruba pa participa cu nos ciclistanan na e paseo silencio aki.

E paseo lo tuma lugar awe diaranson, pa 7 or di anochi. Lo reuni y start na e parkeerplaats dilanti Nagico Insurances na Avenida Milio Croes. Lo continua e paseo pasando den caya Papa Juan Pablo II, Wilhelmina straat, Arnold M. Schutte straat (roundabout), Lloyd G. Smith Blvd, Wendy’s Blvd (roundabout), Lloyd G. Smith Blvd, Las Americas (roundabout), Vondellaan, Caya Papa Juan Pablo II y lo termina bek na Caya Avenida Milio Croes dilanti oficina di Nagico Insurances.

E ruta lo ta uno cortico di mas o menos 8 km y e velocidad lo ta uno abou y apto pa tur edad y nivel. Si, nos kier a recorda pa tur participante ekipa na mes cu reflector, luz y sin lubida nan helm.

Nos ta encurasha grandi y chikito pa bini cu full famia y uni nos forza tur hunto pa concientiza tur automobilistanan cu nos ciclistanan tambe ta desea di participa den un trafico sigur.

Nos ciclistanan ta conciente cu nos ta forma parti di trafico y cumpli cu reglanan di trafico pa nos seguridad ta nos responsabilidad, pero cu un poco cooperacion y respet di parti nos automobilistanan nos tambe por yega cas bek cerca nos sernan keri despues di a practica nos deporte preferi.