Gobierno a otorga tereno na 346 persona

ORANJESTAD - “Bo no mester conocemi como Minister of buska un firma sin balor, manera a sosode cu e Minister anterior di infrastructura. Awor bo derecho ta wordo respeta, como tambe e transparencia y integridad cu esaki mester carga” minister di infrastructura Otmar Oduber a bisa e siman aki na e occasion unda cu a otorga tereno na 346 persona. Hopi di nan tin entre 18 pa 30 aña wardando riba un tereno.

PROCESO

346 persona a ricibi e oportunidad pa nan traha nan cas a base di e peticion cu nan tabatin, 145 di nan ta trata overeenkomst nan cu a wordo firma na e ocasion. Proximo paso aworaki ta pa nan bay notaris, cual nan tin tres luna pa cumpli cu ne. E diferencia grandi ta cu aworaki nan mester firma un Hypotheek akte hunto cu e traspaso di e tereno, contrario na antes. Pasobra kier ta sigur cu e hendenan ta bay traha nan cas y cu por maranan na dje, pasobra ta hopi hende ta wardando un pida tereno pa construi, pa cual nan tin 1 aña pa caba di traha nan cas. E otronan cu a haya nan carta di pre reservering y reservering, ta encera personanan cu tin cierto pasonan cu nan tin cu tuma. Si ta pre reservering, nan tin 30 dia pa mustra cu nan tin un ‘backup’ financiero y a base di esaki ta depende con grandi nan por traha nan cas y a base di esey ta haya e tereno, pa no duna terenonan mas di 600,700, of 800 meter cuadra ciendo cu e forsa di e persona ta pa traha un cas di 150 meter cuadra, teniendo na cuenta e escases di tereno cu tin. Esnan cu a ricibi nan carta di reservering tin 90 dia pa nan entrega nan plannan na DOW pa nan caba di regla tur locual cu ta poni den e website di DIP www.DIP.aw unda cu tin e rekistonan poni na un forma transparente pa loke ta e bouwvergunning. Cual mester por tuma luga entre 4 pa 6 siman despues cu e persona ya tin su carta di reservering.