CITGO Aruba bringando beslaglegging di Conoco Phillips den corte

ORANJESTAD – E compania CITGO Aruba ta bringando un beslaglegging den corte awe mainta, cu e compania Mericano ConocoPhillips a pone riba dos cargamento ayera nochi. Nan kier convence huez cu e crudo riba cual a pone beslag, no ta di PDVSA sino di CITGO. Minister di energia Evelyn Wever a confirma pa NoticiaCla cu e beslaglegging a tuma lugar, y cu CITGO ta bringando esaki legalmente. Un dia prome e mandatario a bisa cu Aruba a ‘scapa’ di beslaglegging di e compania ConocoPhillips, pero a bisa mes momento tambe cu no ta descarta cu lo sigui purba. Y esey a sigui y ayera nochi a pone beslag riba dos cargamento.

KICO A SOSODE

“RdA a informa mi cu ayera nochi a pone beslag ariba dos cargamento di Citgo, di crudo cu ta bin di PDVSA. Citgo ta claim cu e crudo ta di Citgo y nan ta den corte pa mustra cu e producto no ta di PDVSA sino di Citgo. Segun Citgo nan ta cumpra crudo via un sistema cu asina cu e ta riba e barco, e no ta propiedad mas di PDVSA. Cualquier cu ta e resultado, e no ta afecta Aruba”.

BESLAGLEGGING

Manera ta conoci, for di siman pasa caba e compania ConocoPhillips a cuminsa pone beslag riba propiedadnan di PDVSA, sea ta tanki, producto of kico cu nan por haya di e compania multinacional Venezolano. Na Corsou y Bonaire a logra pone beslag pa un suma di riba 600 miyon dollar, pero Aruba esaki no a logra. Te cu ayera. PDVSA debe ConocoPhillips un suma cuantioso, y awor ta tratando na colecta esaki. PDVSA como strategia a opta pa inicialmente no coopera y manda tur su tankinan den laman Caribe, bek pa Venezuela pa evita cu e compania Mericano por pone beslag ariba.