WEB: Blackout di diabierna ta debi na storing di turbina 6

ORANJESTAD – E blackout di diabierna na Aruba na WEB, ta debi na un ‘storing’ di turbina 6. Asina e compania di utilidad WEB a divulga pa medio di un comunicado diabierna atardi. E comunicado ta mustra cu (manera cu ya NoticiaCla a raporta caba den un entrevista live cu e director di WEB Luis Oduber) diabierna dia 11 di mei alrededor di 9:35 di mainta a surgi un interupcion den produccion di coriente na WEB. Esaki a conduci na un blackout cu consecuencia cu full Aruba a keda sin coriente y tambe e presion di awa a keda afecta. Investigacion preliminar ta mustra cu a surgi un storing di turbina 6 cu tabata controla frecuencia na WEB. En total a tarda ± 6 ora pa yega 100% di suministracion di coriente, aunke varios bario a haña coriente dentro di un ora y mey caba. WEB ta disculpa pa e inconveniencia causa y ta gradici pueblo pa su comprension. Alaves WEB ta gradici tecniconan di WEB y ELMAR pa e bon cooperacion durante e blackout. Pa medio di updates riba WEB su pagina di Facebook, WEB a mantene pueblo informa di e progreso y e tempo di espera pa recupera coriente.

TURBINA 6

Indicacion preliminar ta mustra cu e storing a origina den central di WEB na turbina 6 cu na e momento ey tabata controla e frecuencia. Despues di un storing ta cuminsa ehecucion di un investigacion preliminar pa haya sa unda e fayo a tuma lugar y despues ta bay over na isola y of coregi e problema. Unabez cu isola e problema e segundo paso ta pa cuminsa inicia poco poco e suministracion di coriente internamente y despues na Elmar. E proceso despues di un blackout ta tuma su tempo y mester wordo trata cu hopi cautela pa preveni mas disturbio. Ta cuminsa cu e generador di emergencia y sigui cu e motornan Recips cu ta bay relativamente lihe. Asina cu logra esakinan den servicio ta cuminsa suministra coriente na Elmar.

Pa loke ta e boilernan y turbina e proceso ta mas complica y ta tuma mas tempo pa logra stabilisa nan operacion. Unabez den operacion stabil di e boilernan ta cuminsa pone turbinanan den servicio pa asina por sigui suministra coriente na Elmar. Pa mas o menos 3:45 PM Aruba completo a keda suministra cu coriente bek.

Na momento di un interupcion di coriente of awa, comunidad ta exigi informacion al instante di kico a pasa y principalmente cuanto ta bay dura pa e situacion normaliza. Aunke pa WEB e prioridad e momento ey ta pa restablece e situacion di suministro, pa medio di su pagina di Facebook, WEB a mantene comunidad informa di e progreso di recuperacion di coriente. Entretanto e situacion na WEB ta stabil atrobe. Un biaha mas gerencia ta gradici comunidad pa e comprension y ta gradici tur empleado envolvi di WEB y ELMAR pa e esfuerzonan haci.