Situacion delicado na hospital debi na problema cu holo di diesel

PUNTA BRABO – Problema atrobe cu holo fuerte di diesel den e camber di generator a pone e hospital den un situacion critico. Asina NoticiaCla a compronde di parti di gobierno. “Tur esfuerzo ta wordo haci pa contene e problema y evita cu mester kita coriente” e comunicado ta bisa. E situacion ta mustra delicado pero ‘e momento nan aki e ta bou control’. Mas detayes no ta conoci.

PROBLEMA

Den pasado caba tabatin problema na e hospital parti nobo, unda cu holo di diesel tabata pasa den e ductonan di aire den henter e edificio, cu a pone cu tanto trahado tabata bira malo y pashentnan tabata bira mas malo. E situacion tabata uno delicado caba, unda cu mester a evacua tur hende for di e area afecta pa algun rato. Gobierno den e instante ey a bati alarma contra e compania di construccion cu lo no a atende cu e asunto di un forma corecto. Esey ta un di e problemanan cu tin cu e compania di construccion y cu e mandatario encarga di salud Dangui Oduber, a reacciona contra bastante fuerte. No ta conoci ki paso lo tuma den e caso aki.