WEB: No ta conoci ainda kico a causa blackout na Aruba

ORANJESTAD – No ta conoci ainda kico a causa e problema na WEB cu a resulta den un blackout total di e isla. Asina director di WEB Luis Oduber a bisa NoticiaCla awe mainta. E fayo na WEB a surgi mas of menos 9:37am segun Oduber a bisa NoticiaCla diabierna mainta. Tabatin un storing den e central. No por a bisa ainda kico e problema ta, pero e resultado tabata cu tin un blackout total. Tur cos hasta na WEB tabata down. Por dura algun ora pa restablece coriente pero e director no por a bisa exactamente ki ora esaki lo sosode.

GASTURBINE

Segun Oduber, a cuminsa cu e proceso pa start nan turbinanan di gas poco poco y pa identifica kico e problema por ta. Prome paso ta pa identifica e problema, isola esaki y djey bin ariba cu e startup atrobe. Pues ainda e problema no tabata conoci. “E ta algo grandi si pero visualmente no a mira nada” Oduber a bisa. E forma con e coriente a bay (den tres biaha) ,ta berdad pero no kier a specula kico esaki kier men ainda. A sigura cu tin mantencion ta haciendo constantemente pues no por bisa cu si ta falta di mantencion, sino cu algo a pasa.

CUANDO ORA

Unabez cu identifica e problema, por cuminsa cu e startup relativamente lihe segun Oduber. Locual cu ta tarda ta e startup di e boilernan. Esaki pasobra tur e boilernan a ‘trip completo’ cu kier men cu tin cu bay start nan up completamente, mester wak si ningun liña a plug, haya temperatura, cuminsa keinta. Esey ta tarda hopi. Unabez cu esaki ta cla, lo ‘blaas uit’ e loke a keda condensa den e liña. E hecho cu a inverti den ekipo, ta pone cu por start e proceso mas liher manera e Recip. Pero e Recip no ta suficiente pa duna Aruba full coriente, y mester di e boilernan prome. Tin camindanan cu lo por haya coriente mas lihe cu ta posibel.

AWA

Esnan cu ta biba cerca di un tanki di awa, lo no tin problema cu presion di awa, mientras cu esnan cu ta biba mas leu, lo tin problema di presion. Pero no ta cuestion cu no tin awa pasobra e tankinan ta yen. Dus de facto no mester echt tin problema di awa.