Conoce specialista di wowo Dr. Zuleyma Lacle y optometrista David Croes

SAN NICOLAS - Nos isla tin dos specialista di wowo, trahando algun tempo caba na IMSAN na San Nicolas. Dr. Zuleyma Lacle tin casi dos aña trahando como oogarts na Instituto Medico San Nicolas (ImSan). El a studia medicina na Bogota, Colombia. Despues di a termina su estudio el a bin Aruba unda el a traha dos aña na Spoed Eisende Hulp di Imsan. Despues el a bay Colombia un biaha mas pa specialisa durante 4 aña como docter di wowo. Trahando na ImSan el a constata cu tin hopi problema di wowo cu ni na Colombia el a mira. "Tin hopi problema na Aruba, hopi pashent y cada bes ta bira mas y mas trabou. E trabou ta hopi exigente i e ta hopi interesante". Poco poco ImSan ta hayando mas ekipo moderno cu cual por yuda e pashentnan hopi bon. Dr. Lacle a duna di conoce cu e ta lamenta cu tin pashentnan cu ainda mester bay afo pa haya tratamento, pero e cantidad aki ta birando menos.,

Pa dia Dr. Lacle ta atende un promedio di 40 pashent, pero hunto cu su colega Dr. Mosquera y e optometrista nan ta atende mas cu 100 pashent pa dia. E team ta consisti di 2 dokter di wowo y optometrista nan. El a indica cu e optometrista ta esun cu ta midi e bista di e pashent, e presion y ta prepara e pashent pa wordo atendi pa e dokter di wowo.  E dokter nan di wowo ta mira si e pashent por tin algun otro patologia .

Hunto cu dr. Lacle ta traha senor. David Croes kende ta e optometrista. El a indica cu na Colombia el a studia 4 aña pa bira optometrista. Despues el e haci un stage na Hospital San Jose na Bogota. Na aña 1997 el a caba y el a bin traha na Aruba cerca dr. Wolter. Di eynan el a bay traha na un optica y aworaki e tambe ta den servicio di Instituto Medico San Nicolas, el a laga sa. Croes a señala cu ImSan ta hayando basta pashent y banda di esaki nan ta hayando tecnologia nobo. "E pashent ta sali hopi contento ya cu nos por yuda nan cu e tecnologia nobo cu nos tin pa e tratamento di wowo". Un di e ekiponan nobo cu nan a haya ta e Galilei G6, cual ta un “corneal topography” y alabes un bio-meter. Cu e mashin aki por haci un mapa di e cornea pa mira si e pashent tin algun enfermedad manera astigmatismo, por midi cua lens cu e pashent mester den caso di catarata, etc.