CITGO Aruba: ConocoPhillips no a confisca nada di nan

SAN NICOLAS – “ No a confisca ningun propiedad di refineria CITGO Aruba ni CITGO Petroleum ”. Sin menciona e nomber di ConocoPhillips, pero ta referi si na dje, e refineria asina ta desmenti cu e compania ConocoPhillips a confisca algo na Aruba. E unico reaccion hopi breve di un solo frase tabata e reaccion oficial di e refineria na Aruba a confirma pa NoticiaCla diaranson merdia. Cu esaki e pues e ta kita cualkier rumor cu ta coriendo cu e compania multinacional Mericano ConocoPhillips a tuma e propiedad di Aruba manera a bin ta haci cu otro islanan den Caribe. NoticiaCla tabata e prome pa raporta e caso aki diadomingo, unda cu e compania multinacional a cuminsa confisca propiedadnan di PVDSA manera tankinan, refineria y operacion na e.o Corsou, Bonaire, Statia y Aruba. Corsou su gobierno a reacciona caba informando cu nan ta atendiendo e asunto pasobra manera cu e corant Antiliaans Dagblad a raporta, a confisca propiedad di Corsou for di diabierna ultimo cu aprobacion di huez, contrario na declaracion di e agencia di noticia Reuters, cu a bisa cu ta ‘tratando’ pa haci tal.

PROBLEMA

E problema ta uno di varios aña unda cu ConocoPhillips ta purbando di cobra placa di PDVSA pa cosnan cu e multinacional Venezolano a haci. Ta papia di un suma gigantesco di 33 biyon dollar cu PDVSA mester paga e multinacional Mericano. E ta un problema cu ta andando pa 10 aña caba, y cu awor e compania Mericano a dicidi di actua. Den su accion, a dicidi di den un solo tiro, confisca propiedadnan riba varios isla den Caribe cu ta mara of relaciona cu PDVSA. Na Corsou, Bonaire, St Maarten, Statia y otro islanan tambe. Cada uno ta keda perhudica di nan forma y e respectivo islanan ta trahando pa remedia e situacion pa e accion aki no perhudica e islanan mes. Por pensa entre otro di falta di suministro di gasoline y exportacion. Den un medida pa frena e efecto, Venezuela a manda tur su tankeronan bek pa Venezuela, incluyendo un tankero cu tabata poni pa bay Corsou. Tur pa evita cu e compania multinacional Mericano por a confisca esaki.