Henk Kamp ta reemplaza Sybilla Dekker como miembro CAFT

DEN HAAG / ORANJESTAD – Pa Colegio di supervision financiero di Aruba (CAft), ex minister Henk Kamp lo tuma asiento reemplasando actual miembro di Hulanda Sybilla Dekker entrante dia 1e di augustus. Asina e colegio a informa diaranson den un comunicado. Mientrastanto entrante dia 1e di juli 2018 Kamp lo tuma asiento den Colegio di supervision financiero (Cft) di Corsou y Sint Maarten y den Cft di Bonaire, Sint Eustatius y Saba.   Postula pa Hulanda, e lo sucede e miembro actual Sybilla Dekker. Presidente Raymond Gradus: “Henk Kamp ta un persona cu un gran experiencia administrativo y cu hopi afinidad cu Region Caribense; cu baymento di Sybilla Dekker lo a surgi un bashi, cu awor afortunadamente ta yena inmediatamente. Mirando e estado di finanza publico di e paisnan, cual ta exigi hopi atencion, mi ta contento cu e experticio cu Henk ta trece cu ne.”

Dia 9 di mei 2018 Conseho di Ministro di Reino a bay di acuerdo cu designacion di Henk Kamp den e Colegionan di supervision financiero. Anteriormente Conseho di Ministro a haci esey cu su designacion den Cft BES. Henk Kamp tin un trayectoria largo di servicio den administracion publico. Asina, prome cu su ministerio e tabata miembro di Conseho Municipal, miembro di Colegio Ehecutivo Municipal, miembro di Parlamento Provincial di Gelderland y miembro di Tweede Kamer. Den e Gabinetenan Balkenende I y II/III e tabata respectivamente Ministro di Vivienda Publico, Ordenamento Teritorial y Medio Ambiente, y di Defensa. Despues di esey e tabata atrobe miembro di Tweede Kamer y durante dos aña e tabata Comisario pa Bonaire, Sint Eustatius y Saba. Seguidamente e tabata Ministro di Asunto Social y Labor den Gabinete Rutte I y por ultimo Ministro di Asunto Economico den Gabinete Rutte II. Na e momentonan aki e tin ainda varios funcion secundario, entre otro como presidente di e asociacion sectorial di e organizacionnan cu ta activo riba tereno di cuido y asistencia di anciano, enfermo (cronico) y hubentud, y como presidente di Conseho di Supervision di un hospital.

Henk Kamp ta sucede su ex-colega Sybilla Dekker, kende for di 2012 a fungi dos periodo como miembro di Cft. Sybilla Dekker tabata Ministro di Vivienda Publico, Ordenamento Teritorial y Medio Ambiente den Gabinete Balkenende II/III. E miembronan actual di CAft lo tuma despedida di dje meymey di e aña aki. Raymond Gradus ta señala: ”Cu baymento di Sybilla nos ta tuma despedida di un miembro masha aprecia y participativo; semper e tabatin wowo pa e contexto Caribense i e relacionnan gubernamental den cual e supervision financiero mester funciona. Hunto cu e demas miembronan mi ta spera cu deseo e colaboracion cu Henk Kamp.”