Entrante 1 di juni radio emisoranan mester cuminsa paga royalties

ORANJESTAD – Entrante 1 di juni proximo pa prome biaha (den historia) radio emisoranan na Aruba (y Bonaire, Corsou y St Maarten) tin cu paga placa pa por toca cancionnan di artistanan local y internacional. Pro Ducapro (e instancia Caribense) a firma un acuerdo cu e compania Canades SOCAN, y e placa lo keda cobra pa e bufete di abogado DK Legal. Abogado David Kock a confirma pa NoticiaCla cu e deal a keda firma y cu e radionan ta ricibiendo e carta cu e oferta pa nan firma pa por paga royalties. E suma cu e radionan tin cu paga, no ta conoci y Kock a prefera na no divulga esaki na e portal aki ainda. E emisoranan cu no firma e deal prome cu dia 1 di juni, lo haya un cobranza despues di e fecha ey, si en caso nan toca e canticanan toch. Riba un website cu ta wordo lansa proximamente, por mira ken tur ta parti di e lista aki, tanto local como internacional.

E DEAL

E deal recientemente firma ta encera entre otro cu PRO SOCAN lo presenta servicio di administracion pa e islanan Aruba, Corsou, Bonaire, y St. Maarten. Ducapro lo provee e servicio di administracion di e artistanan cu wordo toca. “Nos acuerdo cu Ducapro ta un oportunidad unico pa presencia e comienso di un organisacion nobo di derecho di prestacion den e hemisferio occidental” Eric Baptiste (CEO di SOCAN) a bisa. Abogado pa Ducapro, David Kock a bisa cu SOCAN tin e expertisio pa sostene pago creadornan internacional y local pa medio di tools y proceso pa esaki tuma lugar. Ta conoci cu varios radio a mustra resistencia pa cu e informacion aki y no ta di acuerdo cu tin cu cobra.