Bikker: Ta lamenta declaracionnan politico riba asistencia militar sin check cune

ORANJESTAD – Minister di husticia Andin Bikker ta lamenta declaracionnan haci di entre otro lider di fraccion di MEP Rocco Tjon riba asistencia militar, sin check cune prome. Mester bisa cu e prome cu a mustra su desaprobacion ta parlamentario pa partido AVP Robert Candelaria siman pasa caba. Tabata diamars merdia den e noticiero na Power FM, Bikker a reacciona, bisando cu berdad e la sugeri como un di e hopi posibilidadnan, pa asistencia di militar pa yuda polisnan combati e situacion yegada di Venezolanonan. Segun e mandatario, el a haci esaki a raiz di e noticia cu recientemente a gara varios Venezolano illegal di cual algun di nan tabata den posicion di un ‘handgranaat’, y cu si a activa e granat aki, lo tabata problema. Y mirando cu militarnan tin experiencia den esaki, lo no ta mal idea pa pidi asistencia di e militarnan. Pero segun Bikker, ningun momento e no a haci esaki den un forma di ayudo structural, sino algo di un rato, y depende e situacion. Algo cu segun e mandatario, ta normal. De hecho, e mandatario ta sigura cu e no a haci esaki su so, sino a comunica esaki caba cu prome minister di Aruba Evelyn Wever. “Mi ta lamenta cu no a tuma contacto cumi prome” Bikker a bisa riba e declaracion sigur di Tjon ( e no a referi na Candelaria), indicando cu e tin un bon relacion y comunicacion cu Tjon, sigur mirando su background policial. Y ademas segun Bikker, den pasado recien el a haya bon comentario y feedback y reaccion y conseho riba e tereno aki. “Mi sa hopi, pero mi no sa tur cos” Bikker a bisa, y como tal e ta welcome e comentario di Tjon. Den e caso aki sinembargo e mandatario ta lamenta cu Tjon no a tuma contacto cune y a bay prensa, y awor ta crea como si fuera un ambiente cu tin un discordia den coalicion (Bikker ta miembro di partido POR cu ta miembro di coalicion di gabinete Wever Croes).