Ex minister Croes dilanti mesa berde dia 23 di mei proximo

ORANJESTAD – Ex minister Paul Croes y 30 otro persona mester presenta dilanti mesa berde entre dianan 23, 24 y 25 di mei proximo. Esaki pa trata e caso Ibis den forma di un regie zitting. Vocero di ministerio publico Ann Angela a confirma pa NoticiaCla cu e fechanan aki ta reserva pa e caso aki, unda cu huez lo tende si defensa di e sospechosonan y OM tin pregunta pa investigacion, y palabra nan. Ademas lo stipula fecha pa trata e caso aki den contenido riba un fecha mas despues. E caso ta trata sospecho di soborno, falsificacion di firma y fraude, cometi pa tanto e ex mandatario como e otro sospechosonan. 

PRESENTE

Tur e sospechosonan, entre otro Paul Croes a haya un ‘oproeping’ segun Angela pa ta presente. “Si nan mes no tey, nan abogado sigur lo representa nan” Angela a sigui bisa. Abogado di Croes, Marije Vaders a confirma pa NoticiaCla cu dia 23 di mei ta reserva pa su cliente Croes, y e otronan ta pa e co sospechosonan. Si e ex mandatario mes lo ta presente, no ta confirma ainda segun e abogado.

IBIS

E caso a mira lus di dia aña pasa ora cu a haci e.o. un entrada hudicial na cas di e ex mandatario y varios otro caminda. A sigui varios luna di investigacion y un cantidad di detencion, pa despues e ex mandatario mes keda deteni. Su detencion a dura algun luna prome cu e la recobra libertad temporal na november di aña pasa.