EPI: Accion di docentenan a culmina den atake personal contra directora general

ORANJESTAD - Colegio EPI ta lamenta cu un accion di docentenan cu e intencion pa mehora enseñansa na Colegio EPI, a culmina den atakenan personal den direccion di e Directora General y Managers di Unidad di Colegio EPI. Directora General di Colegio EPI, Undina Harms diahuebs a purba clarifica e situacion di impasse cu a surgi na Colegio EPI ultimo siman. Den un documento extenso di 5 pagina, e ta repasa e historia y situacion pa mustra cu loke nan ta hayando ta entre otro tambe critica infunda di e organisacion.

Segun Harms, e impasse a cuminsa cu e prome carta di docentenan di Unidad Salubridad & Servicio (S&S) dirigi na Minister di Enseñansa y Famia fecha 17 di sep. 2014 caminda a pidi pa un reunion urgente cu Minister pa papia encuanto un trahado administrativo part-time (losse kracht), cu Colegio EPI mester a laga bay, ora cu EPI a wordo notifica door di su schoolbestuur esta, Dienst Publieke Scholen (DPS), cu no por sigui page mas via entrada di ‘Collegegelden’. E carta tambe a menciona e hecho cu e School Maatschappelijk Werkster a baha cu pensioen y no a wordo reemplasa. Hoofd DPS a informa e Directora General di EPI cu e funcion di School Maatschappelijk Werkster ta para y cu un conseho lo bay pa Minister encuanto Collegegelden y losse krachten. Directora di EPI a informa Unidad S&S di e informacion aki di inmediato.

Di dos carta di docentenan di Unidad S&S dirigi na Minister di Enseñansa y Famia fecha 18 di sep. 2014 a bolbe pidi pa un reunion urgente cu Minister pa papia encuanto e contenido di e carta di 17 sep. 2014 cu enfoke riba e servicio na studiante, calidad di enseñansa y continuidad di e organisacion. E di dos carta ta bisa tambe cu docentenan no ta satisfecho cu e mensahe cu DPS a manda. E demas informacion Harms, ta splica detayadamente den e documento (lesa e documento completo aki). Y finalmente, riba e asunto di su posicion como director, Harms tabata corto. “E periodo di e Directora General actual a vence 31 di juli 2014. A peticion di Minister di Enseñansa y Famia e directora actual a keda den e posicion pa 6 luna mas” Harms a finalisa bisando.