Di dos campeonato di AKB ta tuma lugar na Aruba e weekend aki

ORANJESTAD – E di dos campeonado di AKB ta tuma lugar proximamente na Aruba. E lo tuma lugar den Compleho Deportivo Frans Figaroa (Noord) di 2or di atardi pa 8 or di anochi. Na mes momento AKB ta extende un invitacion pa tur otro scol di karate cu no ta miembro di AKB pa participa tambe na e campeonato aki. Participacion pa miembro di AKB ta costa 25 florin y ‘no miembro’ ta 50 florin. Fanaticonan y publico en general ta keda cordialmente invita pa bin presencia e campeonato aki.

E segundo campeonato aki, igual cu e prome, lo conta un biaha mas cu arbitronan internacional. AKB tin e honor di ricibi Sensei Yanis Venizelos Collado, procedente for di Caracas, Venezuela. Su persona ta un arbitro mundial (World Karate Federation, arbitro PKF (Panamerican Karate Federation) y arbitro di e Federacion Venezolano di Karate. E tin un trayectoria largo den karate y desde 1987 e ta dedica su mes na e instruccion y desaroyo di atletanan di rendimento halto tanto den ‘kata’ como ‘kumite’ di cual e atletanan aki (tanto hubenil como adulto) ta forma parti di e seleccion di Venezuela cu resultadonan exitoso. Banda di tur esaki, Sensei Yanis Venizelos Collado ta director tecnico y presidente di e organisacion di karate ‘Mukin Shori Karate Kyokai, cu ta afilia na e Asociacion Hapones di Karate (sede na Tokyo, Hapon).

Sensei Yanis Venizelos Collado no solamente lo ta presente na e 2do campeonato di AKB, pero tambe e lo duna un curso pa tur e coachnan y refereenan local, cual lo tuma luga diabierna 11 di mei na Dojo Konishi, orario ta 5:30 di atardi pa 10:30 di anochi. Tur coach y referee ta bon bini. Costo di e curso ta 25 florin. Esnan cu kier participa mester confirma esaki na AKB (via karatebondaruba@gmail.com).