Baby Lunah ta bolbe gana caso contra AZV

ORANJESTAD – Corte a ordena Uitvoerings orgaan AZV pa paga gastonan medico di Baby Lunah na Merca, tanto esun di e caterisatie di december ultimo, como e siguiente tratamento cu ta sigui e proximo lunanan. Asina e sentencia di 17 pagina ta zona cu ta un otro victoria pa Baby Lunah y su mayornan. Loke cu nan no a logra, ta pa AZV cubri gasto di e ambulance flight pa Merca pa a atende e conferencia medico unda cu Lunah lo a haya un inspeccion. Huez a rechasa tambe e demanda contra minister di Salud. Y finalmente, huez a ordena AZV carga gastonan di e caso.

E CASO

E caso a keda trata dia 29 di januari ultimo unda cu a pidi entre otro pa AZV cubri gasto medico di dos docter cu ta tratando e baby, y cubri e ambulance flight pa Merca. Argumento di e famia ta cu Baby Lunah berdad su situacion ta uno delicado ( e tin e malesa trisomie 18), pero cu na e nivel aki, Baby Lunah a surpasa tur caso anterior y ta wordo considera como un ‘survivor’, esta un baby cu a surpasa hopi fase di e enfermedad. Como tal e ta un caso ‘apart’ cu mester wordo trata como tal tambe. Baby Lunah a nace na december di 2015, despues di cual e lucha pa tene na bida a cuminsa unabez cu a detecta e malesa cu e tin. Pero e famia no a entrega y a cuminsa un lucha fuerte, y cu cada bez ta hayando mas forza y atencion.

AZV

AZV a bringa e casonan constantemente, argumentando cu medicamente e no tin sentido pa trata un caso di un pashent di cual su posibilidad di bida ta sumamente limita. A busca corespondencia y opinion cerca varios medico na Hulanda, Merca y otro parti di mundo, cu grandemente a sostene e pensamento di AZV. Sinembargo segun corte, AZV no a motiva suficiente, e hecho cu no obstante e hecho cu baby Lunah ta un ‘survivor’ y ta un caso apart, pakico no por considera su tratamento como uno corecto. Gran parti di e sentencia ta repasa e corespondencia entre AZV y e mediconan na cual a pidi conseho, y e contesta di e mediconan cu mayornan di Baby Lunah a acudi na dje.

SENTENCIA

Na final, huez a dicta un sentencia unda cu ta duna e mayornan caminda pa cana, dunando AZV ordo pa cubri gasto di dos medico cu a atende Baby Lunah recientemente y tambe loke falta ainda, pero di otro banda a nenga nan algun peticion manera e biahe di ambulance, y tambe e hecho cu kier bringa minister di Salud tambe. Lesa e sentencia AKI.