ConocoPhillips a cuminsa confisca propiedad di PDVSA den Caribe

HOUSTON/CARACAS (Reuters) – E compania petrolero Mericano ConocoPhillips (COP.N) a tuma paso pa tuma e propiedad Caribense di PDVSA, pa forsa un arbitrahe di 2 biyon otorga na e compania Mericano, debi na e proceso di nacionalizacion di nan proyectonan na Venezuela. Asina e agencia di noticia Reuters ta raporta y ta cita personanan envolvi den e proceso. Esaki ta afecta tanto Aruba, Bonaire y Corsou mirando cu riba cada un di e islanan, tin propiedad di e compania PDVSA di un forma of otro.

SPECIFICO

Specificamente, e compania a enfoca riba facilidadnan riba e islanan di Bonaire, Corsou y St Estatius cu ta desempeña papelnan clave den procesa, almacena y mezcla petroleo di PDVDSA pa exportacion. El a ricibi papelnan di corte cu ta permitie conhela propiedad y por bende nan te hasta. E paso aki por debilidad e entrega na petroleo di PDVSA mas ainda.

DEBE

Segun documentonan di corte, CONOCO su demanda ta pa un total di 33 biyon dollar. Nan ta mustra cu “cualkier impacto potencial riba comunidadnan pa motibo di e accion aki ta resulta netamente di PDVSA su nacionalizacion di e propiedad di CONOCO y e decision pa ignora e sentencia di e tribunal Mericano”. E compania a bisa tambe cu e lo traha cu e comunidadnan afecta pa atende cu e asuntonan cu por surgi a consecuencia di e accionnan legal.

KICO TIN

PDVSA tin propiedad considerable den Caribe. Na Bonaire e tin e terminal di BOPEC di 10 miyon bari, cu ta maneha logistica y cargamento di petroleo pa clientenan na Asia. Na Aruba, PDVSA y su unidad di CITGO ta lesa e refineria y un terminal di almacenahe. Na Statia, e ta huur tanki di almacena di NuStar Energy unda cu 4 miyon di bari di petroleo crudo Venezolano a keda confisca pa corte Mericano. CONOCO tambe a purba di busca e inventario di PDVSA na Corsou, cu ta cas pa 335 mil bari pa dia na e refineria Isla, y Bullenbaa. Pero aki no por a ehecuta e orden di corte ainda.

TANKERONAN

PDVSA diabierna a ordena su tankeronan den Caribe pa bolbe Venezuela pa evita problema legal. Varios di e crudonan di Venezuela a keda confisca den ultimo añanan debi na debe habri.