Aruba ta representa Reino Hulandes pa inauguracion presidente nobo Costa Rica

ORANJESTAD—Diamars 8 di mei, pais Costa Rica ta inaugura su Presidente nobo. Durante e ceremonia, Presidente actual, Luis Guillermo Solis ta pasa e mando over na Carlos Alvarado Quesada kende a wordo elegi como Presidente dia 1 di april ultimo. Ta un custumber di Reino Hulandes pa ta representa na toma di posicionnan aki. E biaha aki, Reino a pidi Prome Minister di Aruba Evelyn Wever-Croes pa representa henter Reino Hulandes na e traspaso aki.

Prome Minister lo haci uso di e oportunidad pa probecha pa papia cu mandatarionan di diferente otro paisnan riba diferente temanan cu tin pendiente ainda entre otro cu Panama pa loke ta trata transporte, cu Colombia riba temanan di economia y salud. Principalmente tambe cu representantenan di Costa Rica riba e tema di salud y di studiantenan cu ta haciendo nan estudio na e pais menciona. E mandatario tin riba su agenda un encuentro cu studiantenan Arubano na Costa Rica pa asina e por scucha kico ta nan preocupacion nan.