Regiezitting na october pa determina fecha apelacion caso Mitch Henriquez

DEN HAAG – E proximo paso pa bringa e caso di e Arubiano Mitch Henriquez (EFM) lo ta sea october of november di e aña aki. Ruman muher di Henriquez, Lila a informa cu pa e tempo ey e caso di apelacion lo mester cuminsa pero cu un ‘regiezitting’. Manera ta conoci, e caso pa sentencia e polisnan culpabel di e morto di Henriquez, a tuma lugar mas tempran e aña aki y e famia di Henriquez no a keda contento cu e sentencia y a apela esaki.

REGIE

Durante e regiezitting, lo determina e fecha exacto pa e caso di apelacion tuma lugar. Ademas lo determina si mester di mas investigacion pa e caso aki. E famia mientrastanto a pidi pa sosten atrobe riba su pagina di Facebook, y pa tur esnan cu ta nan tras, pa sostene nan den e lucha aki. Henriquez a fayece na juni 2015 na Hulanda despues di a keda aresta pa polis pa su comportacion despues di un concierto.