Frontera cu Venezuela ta keda cera te otro reunion

ORANJESTAD- Frontera cu Venezuela ta keda cera te siguiente reunion na juni. Asina gobierno di Aruba a informa diabierna mainta pa medio di un comunicado. Manera NoticiaCla a raporta caba, diahuebs ultimo e delegacionnan di Aruba, Bonaire y Corsou a reuni cu delegacion di Venezuela. Ta trata di e reunion como ‘follow up’ di e acuerdo firma dia 12 di april entre Minister di Relacion Exterior Stef Blok y autoridadnan Venezolano, y cu mester sirbi pa haci palabracionnan prome cu por habri e frontera bek. E discusionnan tabata na nivel tecnico riba tema di aduana.

PROBLEMA

E problema a cuminsa dia 5 di januari, momento cu autoridad Venezolano a acusa paisnan Corsou y especialmente Aruba di ta participa na contrabando di material strategico for di Venezuela. Esey tabata motibo pa Venezuela a cera frontera aereo y via lama entre Venezuela y e islanan Aruba, Boneiro y Corsou.

NENGA

Di parti di Aruba Gobierno di Aruba mesora a nenga esaki categoricamente, y mes momento pa evita escalacion di e situacion, a prohibi tur importacion desde Venezuela tanten cu no tin claridad y transparencia riba e procedura y documentacion aproba pa Venezuela.

FRONTERA

E fronteranan lo a keda cera te ora un convenio wordo firma. E convenio a wordo firma dia 12 di april y a keda palabra cu den reunionnan tecnico lo haci palabracionnan bou di ki condicion e transporte via lama por wordo resumi.

DELEGACION

E delegacion di Aruba durante reunion diahuebs ultimo a enfatisa su posicion, cu tanten cu no tin claridad y transparencia riba procedura, documentacion y e autoridadnan competente, no por papia di "business as usual". Corsou y Bonaire si ta permiti e barconan drenta por lo pronto, pero tambe ta insisti cu mester tin e claridad y transparencia ey.

PALABRACION

E delegacionnan a haci e palabracion cu den e siguiente dianan lo intercambia documentonan y e lista di productonan cu Venezuela ta designa pa consumo nacional of riba cual tin restriccion pa exportacion. Y a palabra un siguiente reunion pa dia 6 di juni na Venezuela.

PROCEDURA

Pa e momento ey lo mester tin claridad di con lo bay resumi e transporte via lama na un manera transparente y cu e debido documentacion y proceduranan aproba pa ambos parti. Mientras cu no tin e claridad y transparencia aki, e fronteranan di Aruba ta sigui cera.