Sentencia di ABC pa wetland na de Mill por genera otro caso den corte

ORANJESTAD – Mientras cu e fundacion Aruba Birdlife Conservation (ABC) diaranson a logra via un sentencia di huez pa gobierno fortifica e barera di e tereno disputa entre The Mill Resort y ex House of Cheng, esaki lo nifica posiblemente mas casonan den corte. Asina minister di infrastructura Otmar Oduber a bisa den un conferencia di prensa diahuebs mainta.

CORTE

Segun Oduber, ora cu gobierno blokea tereno priva di un persona of compania manera a sosode aworaki atrobe, ta mas cu sigur cu e compania of persona perhudica lo por hiba gobierno corte pa esaki. Y den e caso aki, Oduber no ta spera solamente un caso pa kita e blokeo, sin tambe daño y perhuicio. Problema segun Oduber ta, cu ta pais Aruba ta perde, pasobra ta gastonan cu tin cu paga awor pa defende gobierno contra un maneho anterior cu no tabata corecto.

PERHUDICA

Asina Oduber a bisa cu tin mas caso pendiente den corte pasobra e compania(nan) a keda perhudica debi na un acto di un gobierno of maneho anterior. Oduber ta referi na e hecho cu a kita tereno di hende, pasobra nan tabata duna ilegalmente, of cu a para proyectonan den ehecucion, pasobra nan tambe tabata riba un tereno cu a keda otorga contra tur regla.