Disputa ken a duna ordo pa Riot Comando actua durante manifestacion

ORANJESTAD - Minister di husticia Arthur Dowers diahuebs mainta a desmenti cu e ta esun cu a duna ordo pa Riot Comando actua. Esey tabata su reaccion riba e manifestacion cu tabatin un dia prome, specificamente riba e acusacionnan cu a wordo haci e.o. door di oposicion riba e uzo di Riot Police. E mandatario a reacciona riba e informacion cu donjo di e emisora Top FM Edmond Croes y otro meneer mas di fam Croes a bisa cu ta minister di husticia a duna ordo pa manda Riot Police (Mobiele Eenheid) riba e manifestantenan, pero tambe a cuminsa cu un "ophitserij" di parti di personanan liga na partido MEP den su direccion. Segun Dowers, e no a keda na esey, ya cu despues a sigui cu expresionnan menasante y palabranan di insulto pa cu su persona como Minister di Husticia. Mientrastanto Edmond Croes a reacciona riba su pagina facebook cu e siguiente mensahe: “@ Dowers; Danki pa e contesta cu no ta abo a duna e ordo! Don't kill the messenger. Ami a haya e info via un polis cu ta keda ripiti cu abo a duna e ordo. Sinembargo, si no ta abo a duna e ordo, ken a dune ??”

Di parti di dowers, e ta mustra cu e ta kere cu como Minister di Husticia e ta carga e responsabilidad pa siguridad di tur hende cu ta biba riba e pais aki, inclusive e hendenan di MEP y tambe sr. Edmond Croes. “ Mi ta kere cu sr. Edmond Croes mester cuminsa siña respeta hende y respeta loke e ta pretende di ta, esta locutor. Si bo kier ta miembro di prensa, bo mester por duna noticia cu bo por verifica. Mi a compronde cu sr. Croes lo a bisa cu un Polis a yame bis'e cu sr. Dowers lo a duna ordo pa Riot Commando actua. Si esey ta berdad, e mester bisa ta cual Polis a yam'e bise. Mi tambe tin indicacion cu tin un persona di partido MEP, y mi lo bis'e esaki ora cu mi top'e, kende ta miembro di Parlamento y a menciona nomber di mi persona y un comandante di ME, kende no tabata presente, cu ta esnan cu lo a duna e ordo."

Riba esey, Croes a sigui pone riba su facebook wall, cu e ta respeta tur hende y e ta traha den e cuadro democrativo y di regla. “ Mi mag ta critico, fuerte, pero dentro di e cuadro permisible. Mi no ta crusa e liña cora, dor di bisa nada robes cu por falta respet, menos di instiga of iets dergelijks. Cu flor, roza y cu perfume dushi, mi lo no por trece mi critica dilanti. Mi no ta haci nada otro cu abo a haci ora bo ta den oposicion. Bo ta corda kico bo tabata papia di Rudy Croes cu Nel ? Asina ta, please, respeta mi trabao y tin lomba hancho pa soporta critica.” Croes a finalisa bisando.

Dowers a sigui bisa cu loke a sosode diaranson anochi, ta cu el a haya informacion di servicio di inteligencia riba cierto asunto. E informe ta bisa cu e prome auto cu pasa, despues cu e caminda wordo habri, lo wordo gebolter y kima. Polis y Ministerio Publico tabatin e informacion aki. OM a actua tambe contra un di e personanan cu a provoca un incidente ora cu e caminda a wordo habri. Segun e mandatario, e auto cu a pasa tabata uno cu dos turista den dje y a wordo ataca. E grupo a rondona e auto y a nenga di move. Nan no a sigui e ordo di polis pa move. "Na e momentonan ey autoridadnan cu tabata na e sitio, y tabatin miembronan di prensa tambe presente a mira kico a pasa. Dowers no tabata na e sitio. E ora ey Polis a cuminsa actua.'

E mandatario a sigui splica cu tur hende mester compronde cu aki na Aruba ta biba den un estado di derecho, unda cu polis mester protege derecho di tur hende. El a bisa cu mescos cu tin derecho di manifesta, hayando permiso te cu cierto ora, na final como lider bo mester bay cu e hendenan cu bo a bini cune. "Bo no ta laga e hendenan aki riba caya, formando un peligro pa bida di otro hende. Mescos cu abo tin bo derechonan fundamental pa protesta, ta un derecho fundamental pa tur ciudadano y bishitante, wordo protegi." Dowers a bisa cu mientrastanto el a mira e imagennan y por a constata cu e lidernan di partido MEP a para instiga e hendenan. E permiso cu a wordo duna tabata pa un manifestacion pacifico y entrega un Manifiesto, pa despues bay for di e sitio. Despues a constata cu a entrega e Manifiesto y a bisa e hendenan pa keda y no bay for di e sitio. E mandatario ta haya e colmo cu esnan cu a haya e permiso ta bisa despues "mi a entrega e protesta aki den man di Polis". Polis den e caso no a organisa e manifestacion, esnan cu a organis'e mester bay cu nan hendenan. "Esey ta liderazgo. Ora cu bo ta crea peligro pa bida di turista na nos pais, y Polis cuminsa actua contra bo, bo no por ta serio y bay crea otro problema, instigando cu ta un hende a duna opdracht pa actua. Polis a actua conforme e necesidad cu nan ta mire ora cu nan tabata presente."

Minister Dowers a splica cu pronto lo tin tur e imagennan, no esnan manipula, cu ta mustra kico algun hende kier haci cu e pais aki, con nan kier degenera cu e pais aki, na uno unda cu hende no tin libertad mas di cana liber.

E ta spera cu organisadornan pidi nan disculpa na comunidad pa loke nan a crea y esnan cu a bira victima di loke nan a crea. "E lo haci un diferencia grandi con mi ta mira e tipo di hendenan aki den futuro. Mi a echt sinti cu ta algo di mala fe a wordo haci." El a agrega cu Polis no por keda tolerante contra cosnan contra ley poniendo nan bida y di inocentenan na peliger.