Plataforma Ley di cacho a presenta campaña pa introduci ley di cacho

Posted on 10/2/2014, 5:43 PM AST | Updated on 10/2/2014, 5:45 PM AST

ORANJESTAD - Cambio drastico den mentalidad lo bay tuma lugar relaciona cu e ley di cacho nobo aki. Plataforma Ley di cacho a presenta su mes ayera (grupo di profesional den tur ramo di cacho, cu a traha voluntariamente pa set up e programa completo ) tabatin como tarea pa prepara Aruba ariba e Hondenverordening cu lo cambia e forma con nos trata nos cachonan. E campaña pa concientisa comunidad, ta inicia diasabra awor 4 di october.

Despues cu parlamento a uni y a aproba unanimamente na 2012 e Hondenverordening nobo, awe porfin por wak e ley ta bira realidad. Minister Dowers ta firma e landsbesluit y pa prome di Januari 2015 e ley nobo di cacho ta drenta na vigor.

Plataforma ley di cacho ta un grupo grandi di profesional cu ta traha diariamente den e mundo di cacho, pero primordialmente e grupo ta consisti di personanan cu realmente tin amor pa bestia y kier wak un mihor existencia pa nos amigonan fiel. E grupo di voluntario cu a uni y a cuminsa traha sin stop riba e plan national, pa por implementa e ley aki den comunidad, awor ta content pa informa pueblo ariba nan responsabilidad cu pa cu nan mascota fiel. Awe e Hondenverordening por conta riba sosten di KPA varios organisacion por ehempel: Gubernamental, non gubernamental como companianan priva. E meta principal ta pa percura cu e pasonan necesario lo keda tuma pa e Hondenverordening por drenta na vigor na 2015. Den menos cu 3 luna e Plataforma Ley di Cacho (PLdC) a logra un campana di concientisacion cu mester duna pueblo tur informacion pa por cumpli cu e ley aki.

Dia international di bestia 4 di October, Plataforma ley di cacho ta lansa nan Campania pa concientisa Aruba riba e ley nobo cu lo trece cambio na 35000 cas na Aruba. E dia aki Dokternan di bestia, trimsalon, programa di television, organisacionnan saliendo na defensa di animal y gobierno durante hopi tempo caba ta trata di educando pueblo con pa actua responsabel, awor ta haya oido den un ley cu ta duna nan sosten pa sali na defensa di nos cachonan. Cacho den cura Ley e ta!

BOET PA ESNAN CU NO TA CUMPLI

Percura pa bo sa kico e ley nobo aki ta nifica pa ABO cu ta doño di un cacho!!!

Despues di prome di januari 2015 e doño ta OBLIGA pa tene su cacho riba su tereno. Polis por actua awor cu facilidad y doñonan mester asumi responsabilidad of por core e peliger di haya boet.

Mesun cos ta conta pa negligencia of maltrato di cacho.

Plataforma a traha un flyer cu lo keda reparti na cada cas na Aruba splicando e puntonan principal di e Hondenverordening:

Bienestar di un cacho: suficiente awa y cuminda, proteccion contra biento y awasero, espacio minimo y obligacion pa e doño di actua ora un cacho ta sufri Obligacion pa tene bo cacho riba bo tereno y ta splica con bo por haci esey ora bo cura no ta cera Obligacion pa cana cu cacho na linea pafor di bo tereno Organisa of asisti na bringamento di cacho lo ta un hecho castigabel y bo por bai hasta na prison p’e

Fuera di e puntonan menciona e Hondenverordening tambe ta habri posibilidad pa Minister apunta cierto cacho of rasanan como cachonan peligroso. Esaki ta solamente posibel si bo cacho ta envolvi den mordemento di persona y polis ta traha process verbaal di dje. Si bo ta na altura cu bo tin un cacho echt peligroso esaki lo keda registra tambe. E posibilidad pa keda cu’n cacho peligroso ta solamente valido pa medio di un permit. Pa cuminsa Minister di Justicia a dicidi pa no apunta ningun cacho of rasa como uno peligroso. Pesey e Plataforma no a enfoca riba e parti aki di e ley durante su campana.

Pa ultimo Plataforma Ley di cacho ta promove doñonan responsabel. E ley aki ta salvaguardia e animalnan indefenso cu awor por fin por disfruta di un bida di calidad, unda cu por come cuminda nutritivo, ta fuera di peliger di trafico y por conta cu un cas yena di amor cu ta proteha. Mas bunita ainda un doño cu por dune cuido medico y cu ta kere den e plan di steralision. Percura pa bo sa kico e ley nobo aki ta nifica abo pa bo no haya bo cu sorpresa prome di Januari.

Pa esnan cu kier sa tocante e ley aki, e voluntarionan di Plataforma lo ta presente na diferente localidad rond di Aruba durante e siman di bestia pa duna informacion. Despues lo tin demostracionnan di e looplijn y “ludieke acties”. Via website www.plataformaleydicacho.org y Facebook plataformaleydicacho, cu folders, banners y entrevistanan riba radio y television e Plataforma lo divulga tur informacion pa crea doñonan responsabel prome cu dia 1 di januari 2015.Percuara pa abo ta un doño responsabel!