Organisadornan di Curacao Ponton Festival declara bancarota

WILLEMSTAD – E compania cu a organiza e festival Curacao Ponton Festival, pero cu a cancela esaki despues tambe, a keda declara bancarota pa huez. No ta conoci cuanto hende a keda perhudica, specialmente un grupo grandi cu ainda mester haya nan placa bek di e carchinan cumpra den ‘voorverkoop’. Segun un comunicado presenta pa bufete di abogado Da Costa Gomez, a confirma cu segun veredicto di huez di dia 24 di april 2018, e compania ta keda declara den estado di faillisement (bancarota), y ta apunta L. Da Costa Gomez como e curator.

E FESTIVAL

E festival cu mester a tuma lugar e fin di siman di dia 6 pa 8 di april, a anuncia dia 5 di april cu nan lo no tene e festival mas debi na varios factor. A anuncia cu lo participa despues ki dia por haya placa bek. Despues dia 12 di april a anuncia cu esnan cu a cumpra carchi via Funmiles por a haya nan placa bek, y esey tabata e prome fase. Pero no ta corda cu a haya mas oportunidad pa esnan cu no a cumpra carchi via Funmiles, tambe a haya nan placa bek. Y awor cu a declara e compania bancarota, no ta conoci cuanto hende a keda perhudica. E potret ta di e facebook site di e organisadornan di dia cu nan a anuncia cancelamento di e festival.