Gobierno ordena pa sigui blokea tereno entre The Mill y ex House of Cheng

ORANJESTAD – Corte a ordena gobierno di Aruba pa dentro di dos siman mas tarda, (sigui) blokea e tereno entre The Mill Resort y e ex ‘House of Cheng’. Solamente cu e biaha aki e mester wordo haci cu entre otro bloki grandi, y no solamente baricada di DOW. Asina huez a dicta den un sentencia den e caso sumario cu Aruba Birdlife Conservation (ABC) a cuminsa contra gobierno. Ademas huez ta prohibi gobierno pa otorga e tereno den erfpacht pasobra e ta viola e destinacion di e tereno cu ta protegi pa e Ruimtelijke Ontwikkelings Plan (ROP), cu ta vigente te 2019. E partido demanda The Mill, no ta valido ya cu a determina cu e compania den su forma registra na Camara di Comercio ta falliet.

E CASO

E fundacion ABC a dicidi di hiba gobierno corte ora cu na comienso di maart ultimo, a mira cu trabounan a cuminsa pa haci e tereno en cuestion cla pa un posibel construccion. E compania menciona den e caso ta Elmford NV, cu lo mester tabata haciendo trabounan pa e hotel The Mill. Aki a bay over tambe pa demanda e hotel, segun e inscripcion cu tin di e compania na Camara di Comercio. Pero a resulta cu e compania manera inscribi, no ta existi mas desde juli 2000. Como tal e no por fungi como partido. Gobierno a argumenta cu e caso no ta necesario den e forma presenta, y cu ta sugeri pa trata e caso den un caso di profundidad, esta un bodem procedura. Ademas, gobierno a mustra caba cu nan no tin problema cu e peticion di blokea e area, y cu de hecho, nan a cuminsa haci esaki caba. Huez di su banda a mustra cu contrario na pensamento di ABC, e tin tur confianza cu gobierno lo sa di respeta e peticion, y como tal no ta impone un multa sugeri di 250 mil florin pa dia of parti di dia cu gobierno no cumpli. Como tal huez a ordena gobierno pa ‘sigui’ blokea e tereno, y prohibi gobierno pa duna e tereno den erfpacht por lo pronto. Lesa e sentencia AKI.