Website di noticia tin cu rectifica contra un gerente di Serlimar

ORANJESTAD – Corte a ordena e compania Real Media Group VOF, doño di e website di noticia Masnoticia.com, pa rectifica un declaracion dentro di 24 ora contra e ciudadano Michael Raymond, un gerente di e compania Serlimar. Pa cada dia cu e rectificacion no aparece, e portal di noticia mester paga un suma di 250 florin te un maximo di 25.000 florin. E motibo pa rectificacion ta e publicacion di un articulo contra Raymond, cu ta daña su reputacion. Den e caso aki corte a indica cu e interes pa drecha nomber di e persona, ta pisa mas cu libertad di expresion.

E CASO

E caso ta uno unda cu e portal menciona a publica un articulo dia 1 di maart ultimo, unda cu ta haci mencion entre otro di cosnan cu Raymond lo ta haciendo. Algo cu segun Raymond no ta cuadra y ta corecto. Entre otro cu e ta gana 7000 mil florin pa luna pa un contract pa laba truck, y cu e ta usando ekiponan di Serlimar sin permiso. Raymond a pidi e portal pa rectificacion, y e portal a dicidi pa publica un articulo den cual mas bien ta relata e peticion pa un rectificacion. Segun Raymond, esey no ta constitui un rectificacion. Como tal a pidi huez pa exigi un rectificacion, mara na un multa. E portal di noticia a argumenta cu e mester por tin e libertad di expresa y publica preocupacion y cosnan den publicidad, cu no ta corecto, citando libertad di expresion y libertad di prensa. A mustra cu ta meramente a publica un declaracion di un grupo di trahado, y cu e no por wordo castiga pa esey. Huez a argumenta diferente y a mustra cu e portal no por simplemente sconde tras di esey (un tercer partido), sin haci e investigacion necesario si e informacion ta corecto. Tambe, e declaracion di e trahadonan ta mustra riba supuesto hechos. Hechos, cu sinembargo den corte e portal no por a bringa cu no ta trata di hechos. Ademas no a acerca e persona en cuestion pa su reaccion prome. Aki, segun corte, e portal a faya den su actuacion pa cual e ta perde e caso. Ademas den defensa den corte, segun huez, e portal a defende e trahadonan pues a para banda di nan. Basa riba esey, huez a dicta fayo pa e portal y a exigi Masnoticia pa rectifica, usando un texto specifico. Por lesa e sentencia AKI.