Knops na parlamentario: Hulanda ta keda preocupa cu finanza di Aruba

DEN HAAG – Gobierno Hulandes ta comparti preocupacion di miembro di Tweede Kamer di Hulanda Andre Bosman riba e situacion financiero di pais Aruba. Asina secretario di estado Hulandes Raymond Knops ta contesta e politico Hulandes den un carta di varios pregunta y contesta dialuna ultimo. “ Mi ta comparti e estado di finanza di Aruba, particularmente e debe halto di gobierno cu mester keda reduci, y cu gobierno no tin un presupuesto multiannual balansa”. Knops ta referi na un combersacion cu e tabatin cu minister di finanza Xiomara Ruiz Maduro di maart ultimo, unda cu e la informa e mandatario di Aruba di su preocupacion. Ademas Knops a confirma cu Hulanda ta hibando discusion cu Aruba riba normalizacion di un forma di supervision financiero despues di 2018. Esaki pasobra pa ley, e poder di CAFT ( y e ley LAFT) ta stop di existi. E intencion segun Knops ta pa logra un finanza duradero di pais Aruba y e reduccion di e debe di gobierno.

PRESUPUESTO 2018

Tambe Knops ta referi na su peticion na Ruiz Maduro pa corda inclui e recomendacionan di e colegio di supervision CAFT den e presupuesto 2018. Parlamento di Aruba a aproba esaki siman pasa diaranson marduga, y Gobernador di Aruba Alfonso Boekhoudt a firma esaki mientrastanto. Pero awor ta keda na e colegio di supervision financiero pa aproba esaki y mira si enberdad e presupuesto ta cuadra cu e loke nan kier mira den dje. No ta conoci ki dia CAFT ta duna su 'veredicto' riba e presupuesto. Den pasado na 2014, ex Gobernador Fredis Refunjol no a firma e presupuesto e tempo ey, cu a pone cu Aruba a haya un 'instruccion' y cu e prome minister di Aruba di e tempo ey, Mike Eman a bay den un welga di hamber. 

Lesa e carta completo AKI.