Docter ta alerta cu studiantenan ta falsifica carta di docter

ORANJESTAD – Un docter di cas di Aruba a bati alarma dialuna, cu tin caso di studiantenan local cu a purba falsifica carta di docter. Tabata dialuna mainta cu e docter di cas local B. a pone e informe aki riba su pagina di Facebook. Informacion cu NoticiaCla tin ta tambe cu Directie onderwijs a informa e docter di e caso aki. Minister di salud mientrastanto tambe a reacciona pa e portal aki, di un forma indigna y sorprendi.

E MENSAHE

E mensahe cu e docter a pone riba su pagina di oficina di Facebook tabata cortico pero cla. “ Siman pasa nos a confirma varios caso di studiantenan cu a purba falsifica 'doktersbrief' durante luna di April! Mayornan por fabor tene cuenta cu nos ta mantene bon comunicacion cu tur directie di scolnan y cu esaki por trece consecuencia pa e studiante na scol” e mensahe a bisa. E docter riba peticion di NoticiaCla, a confirma solamente cu ta trata enberdad di alumnonan di scolnan local, pero no ki scol ni cuanto caso esaki ta.

REACCION DI DOCTER

Segun e docter, nan a papia cu un director di un scol. E docter a sigui bisa cu e director di scol a trece 3 pa 4 carta di cual e docter a constata cu nan tabata falsifica. "E studiantenan basicamente a purba saca copia di e carta  unda cu e firma di dr. ta keda visibel, sin tuma cuenta cu dr tin un stempel special di relieve pa tur su documentonan" e docter a sigui bisa. "Mas informacion nos no kier duna" e docter a finalisa bisando.  .

MINISTER DI SALUD E mandatario a reacciona sorprendi y indigna riba e informacion aki.”Sorprendi pa cu e noticia aki caminda studiantenan a purba falsifica doktersbrief” e mandatario a cuminsa na bisa e portal aki. “ Esaki ta algo serio y tin consecuencianan serio tambe pa e studiantenan na scol. Como minister di salubridad nos lo pone atencion na e fenomeno aki pa evita cu studiantenan lo pensa di haci esaki. Nos kier pidi mayornan pa pone atencion na esaki pa evita cu nan propio yiu ta wordo perhudica” e mandatario a finalisa bisando.