Motibonan cu por a conduci na fin violento di otro manifestacion

ORANJESTAD – Acuerdonan sera pero cambia na caminda, por ta e resultado cu e manifestacion inicialmente pacifico diaranson anochi a termina den un otro episodio violento na final. Potret y videonan di e suseso circulando riba rednan social y otro medionan cybernetico, ta mustrando un imagen cu no ta positivo pa nos isla ; Riot Comando para cu e backdrop di e ‘Aruba’ sign patras. Mientras cu e discusion cu si mester a bolbe uza riot comando of, ta e topico di momento, e noticia real segun NoticiaCla.com a compronde, ta por ta mas bien kico a conduci na e problema; un manifestacion cu a caba mas laat cu tabata originalmente e plan.

E permiso di e manifestantenan tabata poni te cu 6:30pm, despues di cual tur hende lo mester a bandona e lugar. Algo cu no a pasa, y cu polis no obstante esey, a tolera pa un bon rato. Den combersacion cu e organisado Hendrik Tevreden, e la splica NoticiaCla.com cu enberdad e permiso tabata te 6:30. Pero e problema segun Tevreden, tabata e hecho cu e ministernan (den concepto di Tevreden) no a actua corecto door di bira bek y drenta Bestuurskantoor, lagando e grupo di organisadonan di e manifestacion, cu palabra den boca. Esey a trece un disgusto serca e grupo di manifestantenan, cu a pone cu mester a cambia e plan. “Nos tabata kier sikiera un contesta di e minister” Tevreden a bisa NoticiaCla.com. Mesora e polis cu mas autoridad na e sitio, comisario Trudy Hassell a cuminsa negosha y delibera (tarea cu a dune door di alto comisario Dolfi Richardson) pa wak kico por haci. “Nan no ta baha mas” tabata e contesta final cu Hassell a avisa na Tevreden y cu NoticiaCla.com tabata testigo di dje.

A keda Tevreden nada otro di avisa e publico, cu e la cumpli y cu e ta entrega e responsabilidad bek na polis. Esaki sinembargo no a keda aprecia pa esnan presente, particularmente e simpatizantenan di e partido MEP. Dado momento e parlamentario di partido MEP, Xiomara Ruiz a exigi (via speakerphone) cu minister de Meza tin te 8’or pa baha y bin duna contesta na e manifestantenan.

Tabata un hecho for di e momento ey, cu e manifestacion lo a perdura mas cu e ora stipula, pa cual polis mester a cuminsa actua mas severo, pa sigura orden publico. Algun persona cu tabata basta hostina, a cuminsa mustra esaki door di sacudi e heki nan poni como barera, riba cual polis a actua y mustra cu esaki no por. Den e intercambio aki, algun persona a wordo agredi.

Otronan ,-un grupo di hoben-, a dicidi di reta polis door di drumi dilanti di e truck di zonido, y stroba trafico. Polis a opta e ora pa incorpora e Mobiele Eenheid, conoci como riot commando, y pone un barera visto pa evita cu e situacion por a escala. Den esaki, atrobe a bin intercambio di palabra y unda cu cierto agresion a cuminsa pa cual a actua. Versionan (videonan ta circula) ta varia di ken a cuminsa kico, pero por mira algun unda cu polis a agredi algun persona, y di otro banda ora cu algun manifestantenan tambe a   haci mescos. Loke a resalta, ta e videonan (tabata notable cuanto hende a bay cu camera pa saca potret y video) cu a wordo saca y cu ta circulando aworaki, dunando un imagen cu por ta e peor pesadiya pa cualkier cuerpo di polis. Lo ta analisando tur esaki pa mira exactamente ken y kico ta responsabel pa e loke a sosode diaranson. Y mas importante, si e medidanan impone tabata suficiente of si mester pone mas medida of cambia e proceso di manifestacion completo. Foto principal ta mustra con e organisadonan di e manifestacion ta ‘negocia’ cu mando di polis pa un ‘cambio di plan’ despues cu e ora di permiso a pasa caba. E otro foto ta esun cu ta circulando rond cu riot comando para cla pa actua, cu e backdrop di e sign di Aruba den background. E otro potret ta esun cu ta circulando unda cu riot comando ta para cla pa actua, cu e sign di Aruba den backround.