Interpol: Polisnan di Aruba a yuda libera 350 victima di traficacion di hende

MIAMI/ORANJESTAD – Autoridad di Aruba (polis) tabata parti di un operacion internacional cu a logra libera 350 victima di traficacion di hende. Ta trata di un operacion den 13 pais Caribense y Latino Americano cu a tuma lugar recientemente. For di fuentenan di Aruba, NoticiaCla a compronde cu polis di Aruba tabata ‘envolvi den planeamento y ehecucion di e accion’. Mas informacion no por a duna. Awe Interpol oficialmente a publica e relato riba e accion cu a tuma lugar algun siman atras. E ACCION

Ta trata di un operacion di interpol yama ‘Operation Libertad’. Nan a scapa homber, muher y mucha cu a keda trafica pa exterior y forza pa traha. A haya e personanan aki den clubnan nocturno, fabrica, mercado, y mina. Algun tabata traha den espacio no mas grandi cu tamaño di un caha di morto. Polis a detene 22 persona y confisca placa, telefon celular y computer. E operacion ta resultado di un proyecto financia pa gobierno Canades cu a dura 2 aña y mei. Fuera di Aruba, tabatin polis di Corsou y otro islanan tambe envolvi den e operacion.