Entrada exitoso di bapor gigante cu dok flotante na Corsou

WILLEMSTAD - E bapor gigante Chines cu dos dok flotante Xin Guang Hua a logra drenta Annabaai porfin diadomingo mainta trempan, despues di un intento anterior a keda posponi un dia prome. Biento fuerte y laman bruto a pone esnan encarga cu e operacion, Damen, pa pospone e yegada di e bapor aki te cu awe mainta. Hopi interes tabatin pa e yegada, cu a converti e yegada den un 'evento' unico diasabra. Ora cu a bira conoci cu esaki lo keda posponi pa un dia despues, y cu ta mainta hopi trempan e lo a yega, no a kita animo di e interesadonan. Awe mainta atrobe tabatin hende riba pia pa mira e yegada di e bapor impresionante. "Mission accomplished !!" tabata e prome reaccion di prome minister di Corsou, Eugene Ruggenaath awe mainta. " Hopi impreshonante e trabounan di tur nos hendenan tabata ayera i awe mainta den haf! Un tremendo trabou unda Kòrsou un biaha más a mustra kon grandi un isla chiki por ta ora nos ke logra algo" e prome mandatario a bisa riba su pagina di Facebook. Nota:Fotonan cortesia di pagina di facebook di prome minister di Corsou.