Corte a declara Amazonia restaurant bancarota

ORANJESTAD – Corte a declara e restaurant Amazonia den estado di bancarota e siman aki, clausurando asina un episodio den e capitulo aki. Tabata diamars ultimo 30 di september cu e declaracion a tuma lugar y unda cu corte a apunta abogadonan van Eps y Ormel como e curator nan di e propiedad. Cu esaki, ta habri caminda pa esnan cu tin interes di haya nan placa bek, di registra esaki na e curator nan. NoticiaCla.com algun siman atras a indica caba cu su fuentenan a informa cu esaki lo tabata e proceso cu e doño actual, Tim Smith lo a tuma. Cu e bancarota aki tambe, e total di entre 38 pa 40 trahado por cuminsa e proceso di haya nan posibel cesantia paga.

Por corda con algun siman atras, e trahadonan a haya sorpresa di nan bida ora cu nan a yega trabou y haya e porta sera, sin ningun previo aviso. Esaki a dal e trahadonan duro, mirando cu nan no a haya ningun indicacion cu e restaurant tabata den un estado malo financiero. A purba haya atencion di e doño pero esey tabata envano. Nan a involucra minister di labor Paul Croes cu ,-hunto cu e director di labor sr Kock-, a reuni cu e trahadonan. Despues e doño mes a saca un declaracion cu un storia cu a sorprende hopi.

Segun e declaracion di e doño, cos no tabata bayendo bon pa hopi tempo, pero cu e no kier a alarma e trahadonan ni otronan envolvi. E la purba haci tur posibel pa por a scapa e situacion. Pero ora cu a bira obvio cu su ultimo intento tambe tabata envano, a dicidi pa tuma e medida mas drastico, di sera e lugar di forma abrupto. A informa si cu e lo a purba paga e trahadonan, pero no ta conoci si esey a tuma lugar. NoticiaCla.com a tende di su fuentenan despues cu e doño tabatin intencion di declara e lugar bancarota como unico alternativa. Algo cu pues a sosode e siman aki tambe. No ta conoci si e donjo a logra ,-manera cu e la indica-, re ubica e trahadonan otro caminda cu trabou.