Gobernador: Busca balansa entre economia y naturalesa

ORANJESTAD – Nos mester busca e balansa entre economia y naturalesa y haci scogencianan inteligente riba e tereno aki pa tin un Aruba duradero. Esaki tabata parti di e mensahe cu Gobernador di Aruba Su Excelencia Alfonso Boekhoudt a repasa diahuebs anochi durante e recepcion na honor di cumpleaños di Su Mahestad Rey Willem Alexander. Gobernador Boekhoudt a repasa e aña cu a pasa, y haci mencion di e yudansa cu Isla Riba p.e a haya despues di apsada di horcan Irma. Ademas a papia riba e eleccion parlamentario cu a bay den un forma ‘habri, honesto y relativamente trankil’. Y awe e gobierno di coalicion ta trahando riba e retonan financiero y social. Un tema interesante tabata di e diversidad di nos comunidad, cu mas di 93 nacionalidad representa cu ta biba pacifico cu otro. A enfoca riba e importancia di nos papiamento y con cariñosamente nos ta acepta e arubianonan nobo den nos sociedad. “ Mi ta kere cu nos por ta un ehempel pa otro paisnan”, Gobernador a sigui bisa. Segun Gobernador, nos reto pa e añanan nos dilanti ta pa sigui busca e coneccion cu tur grupo den nos sociedad. “ Ningun grupo mester keda marginalisa, segrega of exclui pa motibo cu nan ta diferente. Nos mester crea condicionnan esencial pa esey. Cu legislacion, cu transparencia y cu proceder gobernamental integro. Pero pa un comunidad duradero, inclusive y social, tin mester di mas ainda”.

MENCION SPECIAL

Un mencion special a bay pa e conocido ciudadano Alice van Romondt cu dentro di poco lo ricibi e ‘Zilveren Anjer’, cu van Romondt lo ricibi di prinses Beatrix proximamente. E premio ta pa su aporte incansabel na nos cultura, nos literatura y nos arte na Aruba. Gobernador a mustra cu Alice ta e di tres Arubiano den historia kende ta ricibi e “Zilveren Anjer” aki. Prome cu ne tabata Padú Lampe na 1985 y sr. J.H. Beaujon na 1958, cu a ricibi e reconocimento aki.

INSTANCIANAN CARITATIVO

Gobernador Boekhoudt ta conoci pa ta un hende cu tin un curason grandi pa instancianan special. Aki tambe e la relata riba su bishita of encuentro cu iniciativanan cu conscientemente ta traha na un comunidad inclusive. Ta trata di initiativanan manerea Adopt an Addict, Hands-4-Addicts, Trampolin pa Trabou, “Sea bunita, sea bo mes” y otro bon ehempelnan.

ARUBA DURADERO

Pa loke ta e parti di un Aruba duradero, Gobernador a toca esaki den un forma interesante. Segun Gobernador, un Aruba duradero pe, ta un Aruba, den cua cada Arubiano tin e espacio pa desaroya su mes – teniendo cuenta cu e reglanan cu ta conta pa nos tur. Un Aruba den cua tur hende tin oportunidad- y derechonan igual, tal manera esaki ta stipula den nos leynan. A toca e parti legal tambe, unda cu mester respeta derecho y cumpli cu leynan existente. Y ta duna sosten na Ministerio Publico y un hurisdiccion independiente pa cay aden si tin mester. E aspecto di tereno pa construccion y asina limita nos naturalesa di sigui fortalese, tambe a haya atencion. Gobernador a pidi pa haci scogencianan inteligente y busca un balansa entre economia y naturalesa. Un balansa entre entrada- y gastonan. “Tocante traha of no traha den e espacionan scars cu nos tin ainda riba nos isla chikito y cu ya caba ta hopi pobla. Ta importante pa haci scogencianan, cuanan na fin di cuenta ta bon pa nos y pa nos generacionnan cu ta sigui nos, pa nos yiunan y pa nos nietonan” Gobernador a sigui bisa. Y si tabatin cualkier duda di kico Gobernador tabata kier men, e la haci mencion di algun. “ Afortunadamente ainda a sobra naturalesa na Aruba y mester traha pa proteha areanan cu ta bou di presion pisa, manera Isla di Oro. Ainda aña pasa, durante e traspaso formal di Spaans Lagoen na Parke Arikok, Prinses Beatrix a visibilisa su compromiso pa cu naturalesa di Aruba y hunto cu ne, e bienestar Arubano” Gobernador a a sigui bisa.