Presupuesto supletorio 2014 cu algun recomendacion di CFT a wordo entrega

ORANJESTAD - Manera cu NoticiaCla.com a informa den forma di primicia y exclusividad diadomingo, diaranson atardi minister di finanzas di Aruba, Angel Bermudez a entrega e presupuesto supletorio 2014 na Sr. Gobernador, Fredis Refunjol ayera tardi. Segun Bermudez, den e supletorio a inclui algun di e recomendacionnan cu e secretariado di CFT a duna Gobierno. E cambio mayor den e version supletorio ta e deposito pa sigura e pensionnan di APFA cu un montante di Awg.170 cu ta forma 80% di e total, manera a keda acorda entre APFA, e Sindicatonan y pais Aruba den e protocol 2014.

Tambe mester a haci un reservacion pa cu AZV, ya cu e asina yama ‘health tax’ di 1% BBO te ainda no por a keda aproba den parlamento. Finalmente tambe a reserva 8,8 miyon florin pa diferente gastonan cu ya ta indica un exceso p’e aña aki. Segun Bermudez, asina gobierno ta cumpli cu e contenido di e presupuesto supletorio aki, pues gobierno ta cumpli tambe cu e ‘Koninklijke Besluit’ (KB) y ta spera cu pronto gobernador lo firma e presupuesto 2014.

Na mesun momento Bermudez ta bisa cu gobierno a recupera e presupuesto 2015 pa asina sincronisa esaki cu e cambionan proponi den e presupuesto 2014. “Na momento cu termina di revisa esaki lo haci entrega atrobe na Gobernador pa e wordo trata den Staten”, Minister Bermudez a informa.