- Gotopo: Prolongacion di cierre frontera cu Venezuela ta un medida absurdo
- Ultimatum pa dicidi riba suma cu radionan mester paga DUCAPRO tur luna, a vence sin resultado
- Inflacion ta mas abou na Boneiru, mas halto na Sint Eustatius y Saba
- Gobierno Hulandes ta evaluando pa stop su paginanan riba Facebook
- Travel& Leisure: Aruba ta top lista di 10 resortnan all-inclusive den Caribe
Romero: Implementa cannabis medicinal ta rekeri estudio profundo
ORANJESTAD - Implementa cannabis medicinal ta rekeri estudio profundo. Asina e mandatario Chris Romero a bisa un dia despues cu e mocion pa cuminsa e proceso di legalisacion pa cannabis medicinal na Aruba a keda rechasa den Parlamento. Segun Romero, den un comunicado difundi diaranson, uzo di cannabis medicinal ta tumando hopi forsa mundialmente. Mas y mas ta e paisnan cu ta legalisando e uzo medicinal di e planta aki pa yuda esunnan mas vulnerabel door di nan estado di salud. Esaki ta un realidad creciente mundialmente y como tal aki na Aruba Gabinete Wever-Croes a institui un comision di experto pa sondea e miho opcionnan pa por haci uzo di cannabis medicinal aki na Aruba.
Romero ta enfatisa cu “teniendo na cuenta e pensamento cu nos Prome Minister ya caba a duna di conoce riba e asunto di uzo medicinal di cannabis na Aruba, mi ta di opinion cu e ta na su luga pa duna espacio na e comision encarga cu e analisis, haci lo necesario y realisa tur estudio corespondiente pa asina por yega na un conclusion definitivo riba e topico di cannabis medicinal”.
Mientras cu na diferente pais den nos hemisferio y na Europa tin estudionan extenso cu a keda realisa caba riba e tematica di legalisacion di cannabis, Romero ta di opinion cu no por lubida cu “estudionan haci na otro paisnan no necesariamente ta aplicabel pa nos pais. Nos mester por compronde cu cada pais tin un medida diferente ora ta regarda impacto socio economico. Como tal, nos mester por haci nos propio estudionan encuanto implementacion di cannabis medicinal na Aruba, pa asina por yega na un structura corecto pa su uzo den pashentnan cu mester di dje na nos pais”. Romero a bisa. No a bisa pa ki tempo ta kere cu por papia di un posibel implementacion di e proceso.
Video: Ryçond Santos do Nascimento ta considera su entrada den AVP como un eror
ORANJESTAD – Actual parlamentario independiente mr. dr. Ryçond Santos do Nascimento ta considera su decision pa subi lista berde AVP como un di su erornan cu e la comete den su bida. Asina e parlamentario a admiti na e periodista Tito Laclé durante e programa Noticiacla LIVE diamars anochi. E ta splica esaki den un fragment di e programa.
Minister a anuncia mando nobo temporal na Cuerpo di bombero
ORANJESTAD - Cuerpo di bombero temporalmente tin ekipo nobo di maneho. Por lo menos asina minister di husticia Rocco Tjon a anuncia diaranson mainta riba su pagina di Facebook. Esaki despues cu a manda esun cu tabata na cabes, Emilio Geerman cas recientemente. “Awe mainta nos a reuni cu e miembronan nobo di e management team di brandweer. Esaki mirando e ultimo desaroyonan” e minister a cuminsa na bisa.
Acuerdo di colaboracion entre instancianan di salud mental den CAS-BES reforsa
WILLEMSTAD – Recientemente durante un conferencia cu a tuma lugar na Corsou, diferente partner di salud mental (GGZ) den e Caribe Hulandes a logra adelanto den nan esfuerso pa intensifica e acuerdo di colaboracion titula ‘Dutch Caribbean Mental Health’ y a expresa nan deseao di formalisa esaki den un entidad huridico. Meta di ‘Federatie Dutch Caribbean Mental Health’ ta pa promove calidad di cuido di salud mental riba tur e islanan den Reino. E federacion lo facilita intercambionan di experticio di contenido y e parti organisatorio. Principalmente riba e tereno di calidad, desaroyo continuo, ley y regulacion y educacion.
Gobierno y CAFT ta den proceso pa reemplaza actual miembro pa Aruba ora su termino vence
DEN HAAG - E siman aki cu Minister Maduro di Finansa ta na Hulanda, e mandatario a reuni cu Presidente di CAFT, sra. Lidewijde van Olerongen. Minister Maduro a duna un update riba e trabounan pa mehora maneho financiero di Aruba y a repasa e proceso pa yega na un miembro nobo pa Aruba den CAFT ya cu e termino di sra. Helen van der Wal ta bay yega su fin na augustus e aña aki. E mandatario a combersa tambe riba e reglanan presupuestario y e maneho cu ta wordo traha pa trata cu surplus, ya cu pa basta aña Aruba a conoce solamente presupuesto cu deficit y awo Aruba ta trahando cu presupuesto cu surplus.
Oduber: Maneho nobo pa haya permiso pa hotel; Ta permiti solamente Boutique hotels!
ORANJESTAD – Desde awor en adelante, gobiero ta duna permiso solamente pa traha boutique hotel, vs cualkier otro tipo di hotel. Minister Dangui Oduber diamars a anuncia cu a introduci e maneho nobo di otorgamento pa permiso di hotel den cuadro di turismo sostenibel. “E maneho aki ta tene na cuenta cu Aruba no por sigui crece na e velocidad cu e ta bayendo y mester tuma accionan concreto pa frena e cantidad di cambernan cu ainda lo mester construe”.
A prolonga ciere di frontera cu Venezuela cu cuater luna mas
ORANJESTAD – Ora cu a kere cu awor si ta bay habri frontera cu Venezuela pa e parti maritime, manera tabata indica, dialuna anochi gobierno di Aruba a informa cu un biaha mas ta prolonga e ciere di frontera cu Venezuela, te por lo menos augustus di e aña aki. Frontera cu Venezuela ta cera desde aña 2019, na momento cu Gobierno di Venezuela a cera e frontera unilateralmente. Na mei di 2023 a habri e frontera maritimo basa riba palabracionnan haci entre autoridadnan di Aruba y autoridadnan di Venezuela.
Follow NoticiaCla
