Wever: No tin crisis den gabinete pa rechaso mocion cannabis

ORANJESTAD – E hecho cu e mocion pa acelera e proceso pa legaliza uso di cannabis medicinal no a pasa, no a hinca e gabinete Wever Croes den un crisis. “Nos no ta den un crisis. Nos ta mas fuerte cu nunca” prome minister Wever Croes a sigura NoticiaCla diaranson mainta den un conferencia di prensa. Berdad e mocion no a pasa, pero Wever Croes a informa e portal aki cu awe mainta un di e prome ordenan duna, ta pa e comision reuni riba e tema y cu e lo cuminsa e proceso pa por legaliza e uso di cannabis medicinal. A sigura tambe den un otro pregunta, cu pa ora cu pasa e ley, e lo garantiza cu no por desvia e uso medicinal for di uno recreacional. Wever a bisa tambe cu el a papia cu lider di RED despues di votacion esta Ricardo Croes y a primintie cu e proceso lo cana mas lihe y cu ta mantene e decision manera cu e ta stipula den programa di gobernacion, esta cu ta legaliza uso medicinal di cannabis.