Tres parlamentario a motiva nan voto riba mocion di cannabis medicinal

ORANJESTAD – E mocion pa cuminsa e proceso pa legalizacion di cannabis, particularmente e forma con ta test droga den futuro y haci esaki di un forma cu no ta discrimina contra cannabis, no a haya sosten den Parlamento diamars anochi. Solamente 6 persona a vota pro y 14 a vota contra. NoticiaCla a haya reaccion di 3 parlamentario riba nan motivacion di votacion. Uno cu a vota contra (Sue Ann Ras di MEP) y dos cu a vota pro (Marisol Lopez Tromp y Allan Howell di POR). Lider di e partido RED Ricardo Croes y parlamentario, y minister pa partido RED Rudy Lampe a prefera di no duna comentario ainda diamars.

VOTA PRO

Allan Howell (POR) a vota pro, mirando e hecho cu e base di e mocion ta pa drecha un inhusticia ora di conduci test pa droga, y cu e mocion aki ta un paso pa remedia e problema aki y pesey el a vota pro. Segun parlamentario Marisol Lopez Tromp (POR), e ta mustra cu na paisnan mas grandi cu Aruba ya caba a haci e investigacionnan necesario pa legalisa cannabis medicinal. Esaki pasobra e remedinan cu nos tin actualmente y ta wordo prescribi pa cura nos, no tur ora por cura nos tur. Y como tal Aruba mester tene su opcionnan habri pa cu e proceso aki. Y como tal, e la vota pro.

VOTA CONTRA

Un di e parlamentarionan cu a duna su sosten inicial pa e mocion bay riba rol, pero despues ora di vota, a vota contra tabata parlamentario pa partido MEP Sue-Ann Ras. “Mi a dun’e (Ricardo Croes) mi firma y sosten p’e presenta su mocion. Y apesar cu e mayoria di nos a bis’e pa cambia su consideracionnan y tambe cu esaki no ta e momento, el a opta pa sigui” Ras a cuminsa bisa. “Firma un mocion pa duna sosten, no ta un crimen y masha biaha esaki a yega’y pasa caba. Pero na final loke ta conta ta mi voto. Y esey awor, e mocion aki no tin” Ras a finalisa bisando.