Mocion pa cuminsa proceso pa legalisa cannabis no a haya sosten

ORANJESTAD - E mocion cu porta a hala mas atencion y a tene miembronan di Parlamento hopi ocupa, tabata esun pa cuminsa e proceso pa legalisa cannabis medicinal. Ora cu mas tempran den dia a bira conoci kendenan lo a bay vota pro, partido opositor a cuminsa un campaña pa bringa esaki. Tabatin rumornan persistente cu e mocion aki lo por a trece tension den coalicion, y cu si e mocion no pasa, e lo por tin consecuencia pa e coalicion. Na final, e mocion no a a logra haya confianza di un mayoria y a cay chikito cu 6 voto pro y 14 contra.

REACCION

Un rato despues, prome minister Evelyn Wever Croes a reacciona riba su pagina di facebook riba e tema. "Mi aporte riba e discusion tocante #cannabis medicinal: gobierno ta investigando e forma mas eficiente pa legalisa e uso medicinal di cannabis. Tin un comision trahando riba e tema aki cu ta consisti di representantenan di partidonan MEP POR y RED y di ami ta presidi. Asina nos ta duna contenido na forma responsabel na e acuerdo di gobernacion pa yuda esnan cu pa motibo di salud por wordo yuda pa cannabis medicinal " Wever a finalisa bisando.