Presupuesto 2018 a keda aproba den Parlamento

ORANJESTAD – Despues di 4 dia di tratamento, Parlamento a aproba e presupuesto 2018 diamars anochi laat cu 12 voto pro y 8 contra. NoticiaCla a compronde cu tabatin algun tension den curso tempran di anochi cu a pone cu a surgi un tardanza pa sigui cu e reunion y a surgi un ‘pauze’ di casi 4 ora.

DIA LARGO

Tabata 10’or di anochi numa cu Parlamento a cuminsa trata e parti di votamento di amienda, mocion y finalmente e ley di presupuesto 2018. Manera relata anteriormente, un cantidad record di mocion a keda entrega (86), y riba 2300 pregunta entrega y trata. E forma con a trata e cantidad grandi, tabata prome tur e mocionan cu tabata aproba unanimamente, y despues esnan cu tabatin 12 voto. Despues tabatin votamento cu tabatin 12 voto contra. E resultado di e mocionan cu a pasa cu votonan unanime (parlamento completo) tabata mocionan 1-3, 5, 6, 8-15, 16, 20, 22-26, 32, 35 y 36, 38-45. Pa loke ta e mocionan cu a haya 12 voto pro y 8 contra tabata 4,7,17, 18, 27-30, 31, 37, 47-49, 62-67, 69 y 70, 72, 75, 78, 81, 84 y 85.