Cantidad record di mocion entrega durante tratamento presupuesto

ORANJESTAD – Un cantidad record di mocion a keda entrega durante tratamento di presupuesto 2018 di pais Aruba. NoticiaCla a haya confirma di presidente di parlamento Ady Thijsen cu den careda di 70 pa 80 mocion a keda presenta y mester wordo vota ariba mas laat diamars. Fuera di esey, e cantidad di pregunta cu a wordo manda pa e ministernan, tambe ta hopi halto. Segun prome minister Evelyn Wever Croes, e la menciona cerca di 2000 pregunta manda, cu mester a contesta den un periodo di 1 siman. Ta planea pa parlamento vota pa tur e mocionan aki y e presupuesto diamars anochi.

TRATAMENTO

E tratamento di presupuesto a cuminsa diahuebs mainta tempran, y a sigui diabierna te pasa di mei anochi. A programa e tratamento pa tin 3 minister pa dia, y a schedule 9 pa 10 ora pa dia pa trata esaki diariamente. Sinembargo cos a bay mucho mas largo, unda cu diabierna e la bay te yega mei anochi. Dialuna mainta e presupuesto a sigui su tratamento, unda cu esaki tambe a bay largo te anochi 9’or. Esaki a pone cu mester a pone un extra dia cu ta diamars mainta lagando e tereno pa prome minister Wever Croes so. Den ora di merdia e prome ronda a pasa, sigui pa e di dos tanda. Ta premira cu e votamento lo tarda basta tambe, si tene na cuenta cu ta mas di 80 mocion tin pa vota ariba, banda di e presupuesto mes. Ta premira cu manera custumber, presupuesto lo pasa cu mayoria di coalicion y lo haya resistencia di oposicion.