Anochi a sera cu manifestantenan na Bestuurskantoor

ORANJESTAD - Despues cu un grupo di persona a dicidi di drumi riba vloer dilanti Bestuurskantoor, polis a dicidi di trece miembronan di Riot Comando pa pone ordo y bira e 'baricada humano'. Varios persona tabata raporta cu nan lo a wordo bati cu e klop, of asina yama 'quincena', segun testigonan ocular tabata raporta na e sitio. E multitud cu a manifesta atardi pa Bestuurskantoor pa protesta ( polis a calcula entre 900 pa 1000 persona) contra aumento di tarifa di coriente, a mantene nan mes na e sitio, sin bandona esaki. E lider di e grupo original, Hendrik Tevreden a entrega e responsabilidad na polis mirando cu e permiso di su evento a termina, pero e grupo a mustra cu nan no tabata dispuesto pa bandona e sitio te ora nan haya un contesta di ministernan di gabinete Mike Eman II. E peticion tabata pa e minister dicidi diaranson anochi mes, si ta para e aumento di tarifa si of no. Ministernan a bisa cu nan mester di tempo pa por a dicidi esaki, pero e grupo no kier a tende. Dado momento a dicidi cu un grupo di hoben a drumi abou dilanti di e truck di zonido, strobando esaki di bandona e sitio, manera cu polis a pidi. Te cu 9'or anochi, ainda e grupo tabata para dilanti di Bestuurskantoor. Keda pendiente pa mas informacion segun cu esaki drenta. 

E manifestacion mes a cuminsa den ora di 5 or ora cu un grupo cu polis a calcula na salida, riba 1000 persona, y ora cu a yega na Bestuurskantoor, a aumenta un poco mas. Contrario na biaha pasa, a usa heki di control enbes di baricada di palo, den un forma miho pa controla esnan presente. E polisnan e biaha aki tabata miho prepara, y a usa tambe esnan cu curpa mas grandi, y tambe esnan mas experencia pa atende e situacion. E manifestacion mes tabata hopi pasivo, wardando pa e manifiesto wordo entrega. E manifiesto tabata varios punto pero esun principal ta exigi pa pone un paro of y revoca e aumento di prijs di coriente cu a drenta na vigor 1 di october. Dado caso e manifiesto a wordo entrega, pero cosnan no a bay manera cu a keda palabra. A palabra cu lo a entrega e manifiesto, pero gobierno no necesariamente mester a duna un contesta e mesun dia. Cosnan a cambia na e sitio unda cu a cuminsa exigi pa tin un contesta eynan mes. For di e momento ey, cosnan a bira mas tenso, y a cuminsa cu cierto 'disturbio' cu na final a pone cu mester a bolbe trece riot commando.