No ta cambia ROP pa acomoda parke di molina na Urirama

ORANJESTAD – Ta definitivo cu e di dos parke di molina no ta bin na Urirama. Asina minister di energia Evelyn Wever a bisa durante su contestacion di pregunta den Parlamento diamars mainta. E mandatario a sigura cu no ta bay cambia e ROP pa acomoda e parke na Urirama. Esey ta nifica cu mientras cu e parke por bin, e tin cu keda ubica otro caminda. Si esaki ta nifica otro caso den corte pa e compania responsabel pa establece e proyecto, no ta conoci. Esaki tabata un di e temanan presenta den Parlamento awe mainta.

CORTE

Mientrastanto tabatin multiple casonan den corte pa para e proyecto, loke no a cambia nunca si, tabata e localidad pa e sitio. For di 2014 ta tratando esaki y cada bez tabatin un veredicto cu tabata sea tranca e trabou di e compania, of tabata tranca e trabou di esnan cu tabata protesta. E problema mas bien tabata otorgamento of no di un ‘hindervergunning’. Algun biaha a logra para esaki mientras cu otro biaha corte tabata cita na banda di e compania pa e haya e permiso ey. NOTA: potret ta di archivo di noticiacla di e parke di molina na Vader Piet.