Ultimo manifestacion a costa polis 12.000 florin na overtime

ORANJESTAD – E ultimo manifestacion a costa cuerpo policial 12.000 florin na overtime. Esaki kier men cu cada manifestacion cu tin, ta costa esfuerso y placa segun alto comisario di polis Dolfi Richardson a divulga den un conferencia relaciona cu e manifestacion planea pa diaranson atardi. Mientras cu ta respeta tur manifestacion, a haci apelacion pa tene cuenta cu tin hopi polis riba pia, pa sigura orden publico y esey no ta algo cu ta costa poco placa. Sigur no si mira e orario y e cantidad di personal cu mester pone riba pia. E autoridad di polis a sugeri cu mientras cu no kier bay den e direccion ey, mester cuminsa pensa cu esnan cu ta organisa e manifestacion ta esnan cu mester por paga pa e orden publico.

A mustra cu den otro evenementonan publico caba, polis no ta presente mas, of menos y esaki ta pasobra e ta costa basta placa. Of eventonan cu ta publico despues di cierto ora, mester wordo cubri pa e organisadonan mes. Y ora cu papia di cubri, kier men e gastonan di overtime di polis, pasobra esaki tin su limite y ya caba polis ta pasa of a pasa su limite poni pa overtime caba.

Esey no ta kita afor cu polis lo ta presente, y ta percura pa seguridad di tur hende. Tanto esnan cu ta manifesta, esnan cu ta mira na banda, pero tambe sigur esnan cu ta ‘proteha’, esta cuerpo policial mes. Richardson a bisa tambe cu e lo haci kico cu e mester, pa sigura cu su hendenan haya e proteccion necesario, pasobra nan ta su responsabilidad na final di dia.

Richardson tambe a haci apelacion pa tene cuenta cu tur loke a wordo stipula (NoticiaCla.com a trece esaki caba den forma di primicia), esta cu no ta permiti botter, palo of otro obheto cu por wordo uza como arma, arma mes, bin cu cacho cu por wordo considera como peligroso, y otro tipo di obheto. E zonido tambe mester ta controla, y mester tene na e orario di e permiso. Ya pa 6:30pm e manifiesto di e grupo di diaranson mester keda entrega, pa despues termina e ‘evento’ den un forma pacifico