- AZV: Otro luna tin traspaso automatico di clientenan di dokter Vink pa HOED Piedra Plat
- SETAR a tene su Avigilon ALTA Launch Event cu enfoke riba e futuro di seguridad
- Grupo grandi di ex studiante tin problema pa paga nan Duo lening bek
- CBS: Bestaansminimum a subi atrobe na Aruba debi na aumento di gasto di cuminda
- Figaroa: Proximo gobierno mester consisti di solamente vakministers
Rumannan Chiara y Sophia Petrocchi ganadornan di Copa Hubenil Gobernador Felipe B. Tromp
ORANJESTAD - Diabierna dia 27 di april proximo, Dia di Rey, Gobernador Alfonso Boekhoudt lo entrega e Copa Hubenil Gobernador Felipe B. Tromp na e rumannan Chiara y Sophia Petrocchi. E dos hobennan aki desde 2009 ta dedica hopi tempo na e deporte di Taekwondo y Judo.
Nan ta entrena seis bes pa siman y tin biaha dos bes pa dia bou guia di un experto fisico, entrenador y varios otro mas. Y naturalmente cu e apoyo incondicional di nan mayornan y otro miembronan di famia. Fuera cu nan ta atletanan cu ta dedica hopi tempo na nan respectivo deporte, nan ta alumnonan ehemplar na Colegio Arubano.
Chiara a gana diferente medaya den su carera como atleta. Na 2013 el a ricibi e premio pa atleta hubenil pa 2012 di Premio Simplemente Deporte. Despues di esaki el a gana varios premio den e deporte di taekwondo tanto na nivel local como internacional. Na 2017 el a gana e premio atleta hubenil 2016 di Premio Excelencia den Deporte. Durante 2017 el a logra medaya di plata na US Open na Las Vegas, medaya di oro den Weganan Suramericano Hubenil na Chile.
E aña aki 2018, Chiara ta gana medaya di brons na US Open na Las Vegas, ta keda como number cinco di mundo den e torneo mundial di Taekwondo na Tunesia y ta bira atleta hubenil 2017 di Premio Excelencia den Deporte. Pa su dedicacion na e deporte di taekwondo, den e ultimo diez añanan, Chiara Petrocchi ta parti di e ‘Wall of Rising Stars’ di Paseo Herencia Mall.
E ruman Sophia ta dedica su mes na e deporte di Judo. Na 2017 el a gana medaya di brons den e Open Suramericano na Ecuador. Den e mesun aña e ta logra medaya di plata den e Weganan Suramericano Hubenil na Chile y ta bira e prome medayista pa Aruba den Judo den Weganan Suramericano Hubenil.
Na 2018 Sophia ta gana dos torneo di grappling organisa pa Aruba Judo Bond y Milliard Fighting School. Recientemente el a ser reconoci pa Premio Excelencia den Deporte pa su logro durante e weganan di ODESUR na Chile.
Como muestra di dedicacion y disciplina di dos ruman ariba tereno di deporte y ehempel Comision a dicidi pa otorga Copa Hubenil Gobernador Felipe B. Tromp e aña aki na e rumannan Chiara y Sophia Petrocchi.
Dos otro hoben lo ricibi un premio di estimulo for di Gobernador Alfonso Boekhoudt, esta Shènely Tromp y Elias Halabi. Shènely tin 16 aña y ta un atleta di Malmok Runners desde 2015.
Na Maart 2017 el a representa Aruba na e ‘Youth Games Paralympics’ y a gana un medaya di plata den categoria 100 meter sprint. Shènely tin limitacion di bista pero esey no ta strob’e pa dedica su mes na e deporte di coremento. E ta haya ayudo di FAVI pa e por desaroya na scol y actualmente e ta den tercer grado na Colegio Arubano. E ta haya entrenamento di Jovita y Alberto Maduro pa e por sigui mehora cu coremento.
E hoben Elias Halabi lo ricibi un premio di estimulo pa su dedicacion na e deporte di bowling.
Desde chikito e ta practica e deporte y a gana varios premio tanto local como internacional.
Na juli 2017 el a gana medaya di brons durante e ‘55th Tournament of the Americas’ y campeon Youth Masters na Macau China.
Fuera di ta practica e deporte di bowling, Elias ta asisti diferente coach pa yuda e muchanan mas chikito. Tambe e ta yuda organisa clinica di bowling hunto cu otro atletanan pa hobennan.
Actualmente e ta preparando su mes fisicamente y mentalmente pa por representa Aruba durante un torneo na Bolivia. E ta studiando y preparando tambe pa bay studia den exterior.
E entrega di e premionan lo tuma luga riba Dia di Rey pa 9’or di mainta den Wilhelmina Park despues di e ceremonia protocolar cu discurso di presidente di Parlamento mr. Ady Thijsen y di Gobernador Alfonso Boekhoudt.
Un y tur ta keda cordialmente invita pa asisti na e ceremonia na ocasion di celebracion di Dia di Rey y entrega di premio Copa Hubenil Gobernador Felipe B. Tromp cu presencia di miembronan di Cuerpo di Marina Real, show di Pierewietje y defile di gruponan hubenil uniforma.
E careda di ciclista ‘12 Hours di Aruba’ ta bolbe na 2024!
ORANJESTAD - E tenshon ta subiendo mientras e edicion di 2024 di 12 Hours di Aruba ta acercando. Riba djasabra 20 di april, participantenan entusiasta di entre otro Aruba, Curaçao, Bonaire i Hulanda ta reuni na Sero Cristal pa un di e eventonan mas emocionante den e region. Cu un mescla di adrenalina, team spirit i pa un bon causa, e evento internacional aki organisa pa FX Hubada ta promete pa ta un espectáculo cu ningun hende kier perde.
Coredornan di Aruba ta cla pa e marathon di Londen pa diadomingo
LONDEN – Un grupo basta grandi di por lo menos 10 coredor di Aruba ta participa diadomingo na e marathon di London, considera como un di e marathon crucial internacional. Diabierna nan a registra nan mes oficialmente y a haya nan number y bib (e registro electronico) pa nan por participa. For di e portal deportivo 297 Sports, noticiacla a compronde cu tin por lo menos 50 mil participante diadomingo awor. Esnan di Aruba cu ta participa ta e.o. e docter di cas Joaquin van Trigt y e coredor conoci Shariska Winterdaal, Ana Mujica, Jeanette Croes, Lili Mejia, Edeline Weller, Filomena Paesch, Esther Colina, Carla Fingal y Ricky Refunjol. Potret cortesia 297 Sports.
Rafael Nadal: Mi ta considera esaki como mi ultimo aña (hungando tennis professional)
BARCELONA – E strea internacional di tennis professional Rafael Nadal a anuncia cu esaki ta su ultimo aña professional. “ Mi ta considera esaki como mi ultimo aña y mi kier disfruta di cada momento” Nadal a bisa dialuna durante un conferencia di prensa na Barcelona. E la anuncia su participacion diamars awor na e torneo ATP na Barcelona. Ta su prome participacion despues di a retira tres luna pasa di e torneo na Australia. E ganador di 22 titulo grandslam, a dicidi ultimo momento pa participa e siman aki. E tenista di 37 aña di edad mester a sacrifica varios torneo debi na su condicion fisico cu no tabata optimal. Ultimo tempo e ta sufriendo di basta lesion y a indica aña pasa caba cu esaki por ta su ultio aña. Awe e la confirma cu esaki enberdad ta su ultimo aña hungando tennis professional.
Cantidad record di persona ta den Ronde van Aruba awe
SAVANETA – Un cantidad record di persona ta den Ronde van Aruba (RVA) awe. Segun informacion di e portal 297Sports, un total di 726 coredor ta subi caminda, cual por cierto ta un record. Tur e lunanan di preparacion lo keda demostra awe riba caminda unda e demas participantenan lo duna un show di coremento riba e careteranan di nos dushi isla di Aruba. Lo tin un total di 16 coredor single e aña aki, 57 duo teams cual ta e cantidad mas grandi den historia di RVA. Por ultimo e 149 estafette lo ta den e gruponan di 4 relay, pues 596 persona lo core e 72km rond di nos isla. E fiebre di Ronde van Aruba ya a wordo sinti y lo bay ta grandi awe full rond di nos isla cu hopi mirones canto di caminda. Tin varios happening prepara na e diferente post.
Seleccion cu a conkista 54 medaya den Carifta Aquatics Championship 2024 a bolbe Aruba
ORANJESTAD - Diabierna atardi den un esfera ameno, Minister Endy Croes a ricibi nos Seleccion di Landamento y Seleccion di Landamento Artistico den e VIP room di Aeropuerto Internacional Reina Beatrix. Manera ta conoci, siman pasa nos atletanan a competi den Carifta Aquatics Championships 2024 cu a tuma luga na Nassau, Bahamas y Fort Lauderdale, Florida. Carifta ta e competencia di e mihonan di Caribe. E aña aki alrededor di 400 atleta di 21 pais a participa. Famia y amistad tabata ansioso sperando e yegada di nos atletanan. E hobennan a conkista un total di 54 medaya den dos diferente disciplina acuatico: landamento y landamento artistico. Den e disciplina di landamento a logra 30 medaya y landamento artistico 24 medaya. Pais Aruba a keda na di 7 luga den 21 pais. Den nomber di Gobierno di Aruba, Minister Endy Croes a felicita e atletanan cu nan excelente prestacion den Carifta. Alabes, a gradici e atletanan pa carga nomber di Aruba y laga nos pais briya riba plataforma internacional.
Cantidad di hungadornan internacional den baseball Major League na Merca a baha
NEW YORK — E percentahe di hungadornan internacional hungando baseball professional na Merca, a baha te na 27.8% cu ta e nivel di mas abou desde 2016. Aworaki tin 264 hungador di 19 pais, entre e 949 hungadornan activo total ora cu e temporada 2024 a habri siman pasa. E pais internacional cu tin mas hungador na Merca, ta Republica Dominicano cu 108 hungador, sigui pa Venezuela cu 58 sigui pa Cuba cu 18. Corsou tin 4 mientras cu Aruba tin 1 (oficialmente) cu ta Xander Bogaerts. Actualmente e tin un hungador riba ‘standby’ cu Atlanta Braves, esta Chadwick Tromp. Pa loke ta e ekipo cu tin mas hungador internacional, Houston Astros ta lidera e grupo aki cu 16 hungador, sigui pa San Diego cu 15, Boston cu 14, Miami cu 14 y Cleveland cu 12.
Follow NoticiaCla
