CEO saliente di AHATA Jim Hepple ta keda traha na Aruba

ORANJESTAD – E actual CEO presidente saliente di Aruba Hotel & Tourism & Hotel Associaction (AHATA) Jim Hepple ta keda Aruba despues cu e baha di su funcion na juni. Desde cu e asociacion a anuncia diadomingo den un anuncio cu Tisa LaSorte ta bira e proximo CEO, a surgi e pregunta kico ta pasa cu Hepple. NoticiaCla a compronde di Hepple mes cu e no ta bay ningun caminda, pero ta keda Aruba. Asina e ta desmenti rumornan cu e lo tin interes di establece su mes bek na Corsou.

FUTURO

Den un reaccion cortico pero hopi cla pa e portal aki, Hepple a reacciona y confirma si un rumor, cu ta cu e lo cuminsa cu su labornan nobo na Universidad di Aruba na mei. No a bisa den ki capacidad pero ta conoci cu e lo bay traha den e ramo di enseñansa pa cu turismo y sector hotelero.

CORSOU

Pa loke ta e parti di Corsou, Hepple a desmenti e paso aki. “Mi a wordo acerca pa Corsou durante e ultimo añanan, pero a compronde cu nan ta den proceso pa apunta un CEO nobo” Hepple a cuminsa na bisa. “Y mi no tin ningun interes den e funcion ey” Hepple a bisa. E pensamento ey a bin debi cu den pasado caba el a yega di traha y biba na Corsou unda cu e tabata na cabes di Curacao Tourist Board (CTB) entre mei di 2001 pa augustus 2005. Tabatin rumor cu e lo ta hayando un contract pa biaha 2 dia pa siman pa Corsou, pero esey awor tambe a keda desmenti pa Hepple.

RESIDENCIA

E portal aki a compronde cu e ta trahando pa haya su residencia pa Aruba y falta algun aña so pa logra esaki. Y Hepple a confirma su amor pa Aruba. “Mi ta gusta biba na Aruba y mi ta anticipa pa sigui contribui na e comunidad di Aruba den cualkier forma cu mi por” Hepple a finalisa bisando.