Islanan ABC mester cumpli cu MOU pa trafico maritimo cu Venezuela habri

ORANJESTAD/CARACAS – Pa e trafico maritimo entre Venezuela y islanan ABC normaliza, nos mester cumpli cu tres punto den e MOU cu a keda firma recientemente entre cual mester sigui un proceso di 4 fase prome. Asina minister di transporte di Aruba Chris Romero a bisa durante tratamento di presupuesto. For di momento cu Venezuela y Reino Hulandes a yega na un acuerdo y Venezuela a habri e frontera atrobe recientemente, e parti maritimo si no ta cla ainda. Por lo menos no di parti di e islanan ABC.

FASE

Segun Romero, entre e puntonan di e MOU, tin cu cada barco cu sali for di Venezuela pa islanan ABC (Aruba den e caso aki) mester pidi permiso 48 ora prome cu sali for di Venezuela. Pues no por yega sali sin mas y yega p.e. Aruba. Pa Aruba, directie scheepvaart mester autoriza e permiso aki y duna e ‘pre clearance’. Pa loke ta e di dos fase, na caminda pa Aruba, esnan di e barco mester haya un ligplaats (un lugar pa mara e barco) y e ora specifico di yegada. Pues no por yega ki ora cu ta, ni mara e barco unda cu ta. Cada barco lo haya un lugar y ora asigna awor, cu ta otorca pa APA y ASTEC. E di tres punto ta cu mester controla e validez di documento di e barco y tripulante. E documentonan aki lo keda controla pa IASA. Y finalmente e productonan cu ta transporta, mester wordo controla pa personal di aduana, cu ta e proceso di invoer. Pa loke ta e cantidad di persona, ta permiti solamente 2 persona riba e barco. Pues no por trece extra pasahero, sino solamente esnan cu ta bin cu e carga. Unabez riba waf, grenspolitie lo contina cu e control aki.

DECISION

E proceso ta tumando lugar segun e mandatario y unabez cu esaki ta cla, prome minister di Aruba Evelyn Wever Croes mes lo anuncia esaki publicamente.   E parti aereo ta habri.