Romero: Telearuba lo pasa tur wega di Xander Bogaerts

ORANJESTAD – Telearuba dentro di poco ta bay transmiti tur wega di baseball profesional den cual nos astro di Aruba, e pelotero profesional Xander Bogaerts ta hungando. Asina minister di telecomunicacion Chris Romero a bisa durante tratamento di presupuesto diabierna. Segun e mandatario, nos tin cu duna honor na nos astro, y duna tur hende e posibilidad pa wak e logro di dje, cada bez cu e carga Aruba su nomber na halto den exterior. E mandatario no a bisa si, ki tempo esaki lo sosode exactamente ni den ki forma.

TRANSMITI WEGA

E mandatario a recorda cu for di tempo cu e astro di Corsou Andruw Jones a bira un estrea pa su ekipo Atlanta Braves, Corsou (Telecuracao) tabata transmiti tur e weganan cu e tabata aden. Algo cu a sigui despues tambe cu otro hungadornan di Corsou. Sinembargo aki esey no a tuma lugar. Hopi biaha e problema tabata gastonan halto y permiso di transmision. Gastonan pa transmiti e weganan ta hopi halto y gran parti di esaki ta pa motibo di e derecho di transmision. Aña pasa por corda cu riba presion di comunidad, Telearuba pa medio di Setar, a dicidi cu ta duna e posibilidad aki pa medio di cable riba un canal specifico unda cu pa un suma annual, e cliente por mira tur wega di baseball. Sinembargo esey no tabata garantia pa por a wak tur wega cu Xander Bogaerts tabata hunga. No ta conoci si esaki ta diferente e biaha aki, y si e weganan cu lo wordo transmiti, manera cu e mandatario a bisa, lo ta weganan cu ta ‘habri’